ಪಿರಾಕುರ್ದು ಇತ್ತೆ ಮುಟ್ಟಲಾ ಮಾತೆರೆಗ್ಲಾ ಇಷ್ಟ ಆಪಿನ ತುತ್ತೈತ ಪಂಡ ಅವು ಸೀರೆ. ಕಾಲ ಬದಲಾಂಡಲಾ ಸೀರೆಗುಪ್ಪುನ ಬಿಲೆ ಕಮ್ಮಿ ಆತುಜಿ.ಇತ್ತೆ ತರೆವಾರಿ ನಮೂನೆದ ಸೀರೆ ಬೈದುಂಡು ತುತ್ತುನ ಕಿರಮಟ್ಲಾ ನಾನಾ ನಮೂನೆ ಬದಲಾವನೆ ಆತುಂಡು. ಆಂಡ ಇತ್ತೆದ ಜವನ್ದಿಲು ದಾದ ಮದತುಂಡಲ ಸೀರೆನೊಂಜಿ ಬುಡ್ತುಜೆರು.
ಯೇತ್ ಸೀರೆ ಇತ್ತ್ಂಡಲಾ ಮದಪೆರಾವಂದಿನ ಸೀರೆ ಪಂಡ ಅವು ಅಪ್ಪೆ ತುತ್ತೊಂದಿತ್ತಿನ ಆ ವಾಯಿಲ್ದ ಸೀರೆ. ಅವು ಅರೆನ ಉಡಲ್ದಲೆಕನೆ ಮೆತ್ತನೆ ಮೆತ್ತನೆ, ಮಸ್ತ್ ಪೂ ಇತ್ತಿನ ರಂಗ್ ರಂಗ್ದ ಸೀರೆ.ಬಾರಿ ಕಡಿಮೆ ಬಿಲೆಕ್ಲಾ ತಿಕ್ಕೊಂದಿತ್ತ್ಂಡ್. ಆ ಸೀರೆದ ಉಪಯೋಗ ವಾ ವಾ ನಮೂನೆದ ಪಂದ್ ನೆಂಪುಡೆ? ಆ ಸೀರೆದ ಮೆದಲೆಡ್ ನಾಚಿಗೆಡ್ ಮದೆಯಾವೊಂದಿತ್ತ, ಉಲಾಯಿ ನೂರ್ದು ಬುಲಿತೊಂದಿತ್ತ, ಸೆರಗ್ ಪತೊಂದು ಊರೂರು ಬಲಿ ಬರೊಂದಿತ್ತ, ಉಜ್ಜಾಲ್ ಮಲ್ತುದು ತೂಂಕೊನ್ದಿತ್ತ ಅತೆ..
ವಾಯಿಲ್ ಸೀರೆನ್ ತುತ್ತಿನ ಅಮ್ಮನಕ್ಕುಲು ಐತ ಮೆದಲೆಡ್ ಯೇತ್ ಪೂರಾ ಬೇಲೆ ಮಲ್ತೊಂದಿತ್ತೆರ್,ದುನ್ನದ ದಾಲ ತುಂಬುನಗ ತೆರಿಯ ಮಲ್ತ್ದ್ ಮಂಡೆಗ್ ದೀವೊಂದಿತ್ತೆರ್, ಚಾತ ಕುದ್ಪೆ ಜಾವರೆ, ಜೋಕುಲೆನ್ ಮೀಪಾದ್ ಮೆಯ್ ಒಚ್ಚರೆ,ಬಾಲೆದ ಪೀಂಕನ್ ಒರೆಸರೆ, ಸೆಕೆತಪಗ ಗಾಳಿ ಪಾಡರೆ, ಮೋನೆ ಒಚ್ಚರೆ, ಸೂಯಿಂಪರೆ, ಬೂರ್ದ್ ಮಂಡೆಡ್ ಗುಲ್ಲೆ ಬತ್ತ್ಂಡ ಸೀರೆದ ಕೊಡಿನ್ ಮುದ್ದೆ ಮಲ್ತ್ದ್ ಬಾಯಿದುಲಾಯಿ ದೀದ್ ಉರ್ತುದು ಮಂಡೆಗ್ ಸೇಕಲಾ ಕೊರೊಂದಿತ್ತೆರ್,ಕುಂಟುನು ಮದೆ ಮಲ್ತ್ದ್ ಮಿರೆ ಪೇರ್ ಕೊರೊಂದಿತ್ತೆರ್ ಅತೆ.
ಅಪ್ಪೆನ ಆ ಸೀರೆ ಪರತಾಂಡಲ ದಕ್ಕುನವು ಅತ್ತ್ .ಪೆದ್ಮೆದಿನ ಮೆಯಿರ್ದ್ ಪೋಪಿನಿ ತೆಟ್ಟ್ ನೆತ್ತೆರ್ಗ್ ಗಲಸೊಂದಿತ್ತಿನ ಅಡ್ಡ ಕುಂಟು ಅವ್ವಾದಿತ್ತ್ಂಡ್, ಸ್ಯಾನಿಟರಿ ಪ್ಯಾಡ್ ಉಪ್ಪಂದಿನ ಆ ಕಾಲೊಡ್ ತಿಂಗೊಳ್ದ ಸೂತಿಕಗ್ ಪೊನ್ನುಲು ಅವ್ವೆ ಸೀರೆನ್ ಪರ್ತ್ದ್ ಗಲಸೊಂದಿತ್ತೆರ್, ಪೆದ್ಮೆದಿನ ಬಂಜಿ ಎಲ್ಯ ಆವೊಡು, ಬೆರಿಕ್ ಬಲ ತಿಕ್ಕಡ್ ಪಂದ್ ಅಪ್ಪೆನ ರಡ್ಡ್ ಸೀರೆಡ್ ಗಟ್ಟಿ ಜಟ್ಟಿನ್ ಕಟ್ಟೊಂದಿತ್ತೆರ್, ಪುರುಬಾಲೆನ್ ಸುಂದರೆ,ಮಡೆ ಒಚ್ಚರೆ, ಜೆಪುಡಾವರೆ ಅಪ್ಪೆನ ಅವ್ವೆ ಕುಂಟು ಬೋಡಿತ್ತ್ಂಡ್, ಆತ್ ಮಾತ್ರ ಅತ್ತ್ ಪುರುಬಾಲೆದ ಮಂಡೆದ ಅಡಿಕ್ ದೀಪಿನ ತೆರಿಯಗ್ ಈ ಸೀರೆದ ಕುಂಟುನು ಪೊರ್ಲುಡು ಸುತ್ತೊಂದಿತ್ತೆರ್, ಎಲ್ಯ ಜೋಕುಲೆಗ್ ಬಯ್ರಸ್ದೆಕ ಸೊಂಟೊಗ್ ಅಡ್ಡ ಕಟ್ಟೊಂದಿತ್ತೆರ್, ಬಾಲೆ ಕಂಜಿದ ಕೆಕ್ಕಿಲ್ ಕಾಯರೆ ಬಲ್ಲಿ ಪಂದು ಐತ ಬಲ್ಲ್ಗ್ಲಾ ಸುತ್ತೊಂದಿತ್ತೆರ್.
ಗುಜ್ಜೆ ಕೊಚ್ಚಿನಗ, ಪಜಿರ್ ಕೆತ್ನಗ, ತಪ್ಪು ತೌರ್ನಗ ಕತ್ತಿ ತಾಗ್ದ್ ಗಡಿಯಾಂಡ ಒಂತೆ ಚಾತ ಪೊಡಿ ಪಾಡ್ದ್ ಉಂದುವೆ ಕುಂಟುಡ್ ಕಟ್ಟೊಂದಿತ್ತೆರ್, ಕಾರ್ ಪೆದಂಕೆ ಬೂರುಂಡ ಸಕ್ಕರೆ ಪಾಡ್ದ್ ಕುಂಟು ಚಂಡಿ ಮಲ್ತ್ದ್ ಕಟ್ಟೊಂದಿತ್ತೆರ್, ಒಲು ಎಂಚಿನ ಗಾಯ ಆಂಡಲಾ ಅಮ್ಮನ ಸೀರೆದ ಕುಂಟುದ ಬ್ಯಾಂಡೇಜ್. ಬಡಪತ್ತ್ದ ಆ ಪೊರ್ತುಡು ಆ ಸೀರೆದ ಕಪ್ಪು ಪಟ್ಟಿ ಕುಜಲ್ಗ್ ಪಾಡುನ ರಿಬ್ಬನ್ಲಾ ಆತಿನ ಉಂಡು, ಅಕೇರಿಗ್ ಅವು ಆಟ್ಪಿಲ್ಲ್ಡ್ ಕೈಕುಂಟು ಆಪುಂಡು.
ಅಂಡಾ ಮಾತೆಡ್ದ್ಲಾ ಜಾಸ್ತಿ ಉಡಲ್ ಗೆಂದಿದಿನ ಸೊತ್ತು ಪಂಡ ಅಮ್ಮನ ಪರ ಸೀರೆದ ದಡ್ಕ್ . ನಾಲೈನ್ ಪರಿದಿನ ಸೀರೆಲೆನ್ ಒಟ್ಟುಗು ದೀದ್ ಪೊಲ್ಲುದು ದಪ್ಪದ ಮಂದಿರ್ದೆಕ ಮಲ್ತೊಂದಿತ್ತೆರ್. ಅವು ಅರೆಗೊಲೊಗ್ ಅಡಿಕ್ ಆವೊಂದಿತ್ತುಂಡು ಮರಿಯಲಡ್ ಅವೆನ್ ಪೊದೆತ್ತ್ದ್ ಗಟ್ಟಿ ಜೆತ್ತೊಂದಿತ್ತ ಅಪ್ಪೆ ಮಟ್ಟೆಲ್ದ ಬೆಪ್ಪು ಐತ ಉಲಾಯಿ ನಮಕ್ ತಿಕ್ಕೊಂದಿತ್ತ್ಂಡ್
ಕಾಲಬದಲಾತ್ತ್ಂಡ್ ನೈಟಿದ ಪ್ರಭಾವ ಜಾಸ್ತಿ ಆತ್ಂಡ್. ಆಂಡಲ ಹಳ್ಳಿದ ಅಪ್ಪೆನಕುಲು ಇತ್ತೆಲಾ ವಾಯಿಲ್ ಸೀರೆ ತುತ್ತುವೆರ್ ಇರ್ವತ್ನಾಳ್ ಗಂಟೆ ಸೀರೆಡೇ ಉಪ್ಪುನಕಲೆಗ್ ಪಟ್ಟೆ ಸೀರೆಡ್ ಆತ್ ಕುಶಿ ಇಜ್ಜಿ. ಮದಿಮೆ ಮಸಿರಿಗ್ ಪಂದ್ ತುತ್ತಿಯೆರ್ಡಲಾ ಬತ್ತುದು ದೆಪ್ಪುನೆಟ ಅಕಲೆಗ್ ಸಮಾಧಾನ ಉಪ್ಪುಜಿ, ದಂಬು ಕಟ್ಟುಂಡು ಪನ್ಪೆರ್. ಅಪ್ಪೆನ ಆ ವಾಯಿಲ್ ಸೀರೆ ಎನ್ನುನಗ ಇತ್ತೆಲಾ ಉಡಲ್ ಬೆಪ್ಪು ಆಪುಂಡು.
ಗೀತಾ ಲಕ್ಷ್ಮೀಶ್