ಮುಂಬಯಿ: ನಾಟಕ್ ಬರಯ್ಣಾರ್ ಆನಿ ನಿರ್ಮಾಪಕ್, ಜೊಸೆಫ್ ಡಿ ಸೊಜಾ ಬೊರಿವ್ಲಿ ಹಾಚೊ ಚೊವ್ತೊ ಆನಿ ನವೊ ನಾಟಕ್ "ದೆವಾಚೆಂ ಘಡಿತ್ ಕೋಣ್ ಮೊಡಿತ್" ಹ್ಯಾಚ್ ಜುಲಾಯ್ 2 ತಾರಿಕೆರ್ ದಹಿಸಾರ್ ಸಾಂ. ಲುವಿಸ್ ಇಗರ್ಜೆಚ್ಯಾ ಇಸ್ಕೊಲ್ ಸಾಲಾಂತ್ ಉಗ್ತಾವಣ್ ಕೆಲೊ. ಉಗ್ತಾವಣ್ ಕಾರ್ಯಾಕ್ ಬರಯ್ಣಾರಾ ಸವೆಂ ದಿಗ್ದರ್ಶಕ್ ಮಾನೆಸ್ತ್ ವಿಲ್ಲಿಯಮ್ ಮಚಾದೊ, ಸಹ-ದಿಗ್ದರ್ಶಕ್ ಮಾನೆಸ್ತ್ ಪ್ರಸನ್ನ್, ನಿಡ್ಡೊಡಿ ಸವೆಂ ಸರ್ವ್ ನಟ್ ಆನಿ ನಟಿ ಹಾಜರ್ ಆಸ್ಲಿಂ.
ಮಾನಾಚಿಂ ಸಯ್ರಿಂ ವೆರೊನಿಕಾ ನೊರೊನ್ಹಾ (ಕೆನರಾ ಕೊಂಕಣಿ ಎಸ್ಸೊಶಿಯೇಶನ್-ಬೊರಿವ್ಲಿ), ನಾಟಕ್ ಸಂಯೋಜಕ್ ಜಾನೆಟ್ ಸಲ್ದಾನ್ಹಾ ಆನಿ ಹೆಲೆನ್ ಡಿ ಸೊಜಾ, ಜೋಯ್ಸ್ ಡಿ ಸೊಜಾ ಆನಿ ಐಡಾ ಪೆರೇರಾ ತಸೆಂಚ್ ತಾಂಚೆ ಸವೆಂ ನಟ್- ಜೊರ್ಜ್ ಸಿಕ್ವೇರಾ, ಜೊಸ್ಸಿ ಗೊನ್ಸಾಲ್ವಿಸ್, ಎಲಿಯಾಸ್ ಪಾಯ್ಸ್, ಹೆನ್ರಿ ಡಿ ಸೊಜಾ, ಮೆಲ್ವಿನ್ ಡಿ ಸೊಜಾ, ನಟಿ- ಜೂಲಿ ವಾಸ್, ಜೆನಿತಾ ಡಿ ಸೊಜಾ, ಜುಲಿಯಾನಾ ಡಿ ಸೊಜಾ ಆನಿ ಪ್ರೊಮೋಟರ್ ಲುವಿಸ್ ವಾಸ್ ಹಾಂಚ್ಯಾ ಹಾಜರ್‍ಪಣಾರ್ ಕಾರ್ಯೆಂ ಚಲ್ಲೆಂ.
ಮಾಗ್ಣ್ಯಾದ್ವಾರಿಂ ಎಲಿಯಾಸ್ ಪಾಯ್ಸ್ ಹಾಣೆಂ ಕಾರ್ಯಾಚಿ ಸುರ್ವಾತ್ ಕೆಲಿ. ಬರಯ್ಣಾರ್ ಜೊಸೆಫ್ ಡಿ ಸೊಜಾ ಹಾಣೆಂ ನಾಟಕಾ ವಿಶಿಂ ಸವಿಸ್ತಾರ್ ಥರಾನ್ ವಿವರ್ ದಿಲೊ. ಆನಿ ಉಪ್ರಾಂತ್, ಆಯಿಲ್ಲ್ಯಾ ಸಯ್ರ್ಯಾಂಕ್ ಫುಲಾಂ ದೀವ್ನ್ ಸ್ವಾಗತ್ ಕೆಲೊ. ಹೊ ನಾಟಕ್ ಒಕ್ಟೊಬರಾಚೆ 22 ತಾರಿಕೆರ್ ಪ್ರೋಬೋಧನ್ ಕಾರ್ ಠಾಕ್‍ರೇ ಸಾಲ್, ಬೊರಿವ್ಲಿ ಹಾಂಗಾಸರ್ ಪ್ರದರ್ಶಿತ್ ಜಾತೊಲೊ ಮ್ಹಣ್ ಸಾಂಗ್ಲೆಂ. ಹ್ಯಾ ನಾಟಕಾಕ್ ಪದಾಂ ಜೆರಿ ಬೊಂದೆಲ್, ಸಂಗೀತ್ ಮಾಂಡಾವಳ್ ರೋಶನ್ ಅಂಜೆಲೊರ್, ಸಂಗೀತ್ ವ್ಯವಸ್ತಾ ಫೆಡ್ರಿಕ್ ಆನಿ ನಾಚ್ ಜೆನಿತಾ ಡಿ ಸೊಜಾ ಹಾಂಚೆ ಥಾವ್ನ್ ಆಸ್ತೆಲೆಂ ಮ್ಹಣ್ ಕಳಯ್ಲೆಂ. ಉಪ್ರಾಂತ್ ನಾಟಕಾಚ್ಯೊ ಪ್ರತಿಯೊ ಪಾತ್ರ್ ಧಾರಿಂಕ್ ಹಾಸ್ತಾಂತರ್ ಕೆಲ್ಯೊ. ಉಪ್ರಾಂತ್ ದೋನ್ ದ್ರಶ್ಯಾಂ ವಾಚುನ್ ಹ್ಯಾ ವಿಶಿಂ ಭಾಸಾಭಾಸ್ ಜಾಲಿ.
'ಕಲಾಸಮ್ರಾಟ್' ದಿಗ್ದರ್ಶಕ್ ವಿಲ್ಲಿಯಮ್ ಮಾಚಾದೊ ಆಪ್ಲ್ಯಾ ಉತರ್ ಪ್ರಾಯೆರ್ ತರೀ ಆಪ್ಲೆ ವೇಳ್ ನಾಟಕ್ ನಿರ್ದೆಶನ್ ಕರುಂಕ್ ದಿತಾ ತರ್ ತಾಕಾ ನಾಟಕ್ ಕಲೆ ಥಂಯ್ ಆಸ್ಚೊ ಮೋಗ್ ದಾಕವ್ನ್ ದಿತಾ. ತಾಣೆಂ ಪಾತ್ರಧಾರಿಂಕ್ ನಟನಾಂ ವಿಶಿಂ ಥೊಡಿ ಮಾಹೆತ್ ದೀವ್ನ್ ಹೊ ನವೊ ನಾಟಕ್ ಯಶಸ್ವಿ ಕರುಂಕ್ ಉಲೊ ದಿಲೊ. ಉಪ್ರಾಂತ್ ಸಹ-ನಿರ್ದೇಶಕ್ ಪ್ರಸನ್ನ್, ನಿಡ್ಡೊಡಿನ್ ಆಪ್ಲ್ಯಾ ಶೈಲಿನ್ ನಾಟಕಾಚ್ಯಾ ಪಾತ್ರಾಂ ವಿಶಿಂ, ನಟನಾ ವಿಶಿಂ ಮಾರ್ಗದರ್ಶನ್ ದಿಲೆಂ ಆನಿ ಸರ್ವ್ ಕಲಾಕರಾಂಕ್ ಅಭಿನಂದನ್ ಪಾಟಾವ್ನ್ ನಾಟಕಾಕ್ ಯಶಸ್ವಿ ಮಾಗ್ಲಿ.
ಆಕೇರಿಕ್ ಮಾನೆಸ್ತ್ ಜೊರ್ಜ್ ಸಿಕ್ವೇರಾ ಹಾಣೆಂ ಸರ್ವ್ ಕಲಾಕಾರಾನಿಂ ಮೆಳೊನ್ ಎಕಾಮನಾನ್ ಕಾಮ್ ಕರುನ್ ಹೊ ನಾಟಕ್ ಯಶಸ್ವಿ ಕರುಂಕ್ ವಿನಂತಿ ಕೆಲಿ ಆನಿ ನಿಮಾಣೆಂ ಮಾಗ್ಣ್ಯಾ ದ್ವಾರಿಂ ಕಾರ್ಯೆಂ ಸಂಪಯ್ಲೆಂ.