ಎಲ್ಲಿರ್ದ್ ಮಲ್ಲ ಮುಟ್ಟಲಾ ನರಮಾನ್ಯಗ್, ತಾನೇ ಮಲ್ಪೆರೆ ಆವಂದಿ ಒಂಜಿ ಕೆಲಸ ಪಂಡ ಅವು ಕುಜಲ್ ದೆಪ್ಪುನವು!. ಗಾಂಧೀಜಿ( ಅರೆ ಮಂಡೆಡ್ ಕುಜಲ್ ಉಪ್ಪುನಗ) ದೆತ್ತೊಂತೆರ್ ಗೆ ಪನ್ಪಿನ ಕೇಂದೆ!. ಎಂಚನಾ !?. ಯಾನ್ಲಾ ಸುರೂಟು ಈ ನೈಜೀರಿಯಾಗ್ ಬತ್ತಿನಪಗ ಮುಲ್ತ ಕಪ್ಪುದಕ್ಲೆನ್ ತೂದು ಇರ್ಮೆನ ಆದ್ ಯಾನೇ ಕುಜಲ್ ದೆತ್ತ್ಂಡ ಎಂಚಾವು ಪಂದ್ ಅಂದಜಿ ಮಲ್ತಿತ್ತೆ. ಕಾರಣ ಪಂಡ ಇತ್ತೆ ಎನ್ನ ಮಂಡೆಡ್ ಕುಜಲ್ಲಾ ಕಮ್ಮಿ ಆತ್ತ್ಂಡ್. ಸುಗ್ಗಿದ ಕಂಡದ ಬರಿಮಣ್ಣ್ ದೀತಿನ ಪುಣಿಟ್ ಪಜಿರ್ ಕೊಡ್ತಿ ಲೆಕ್ಕ ಅರು ಅರುಟು ಮಾತ್ರ ನಾಲ್ ಕುಜಲ್ ಒರಿದಿನಿ. ಬೊಕ್ಕ ನಡುಟ್ ಅಲಕ್ಕ ಬೋರ್ಮಂಡೆ ಆತ್ತ್ಂಡ್. ಅಂಚ ಆಲೋಚನೆ ಮಲ್ತೆ. ಆಂಡ ಪಿರವುದು ಮೈಕ್ ದೆಪ್ಪೆರೆ ಆವಂದ್ ಪಂಡ್ದ್ ಬಾರೀ ನಾಮೂಸ್ಡೇ ಸೆಲೂನ್ಡ್ ದೆಪ್ಪಾವೊಂದು ಉಲ್ಲೆ. ದೇವೆರ್ನ ದಾದ ಗೊಬ್ಬಾ ದಾನ್ನ ಪಾಪ ಮುಲ್ತ ಅಂಜೋವು ಪೊಂಜೋವುಲೆನ ಮಂಡೆದ ಕುಜಲ್ ಅವು ಒಂಜಿ ನಮುನೆ ಚೂರಿಮುಲ್ಲುದ ಬಲ್ಲೆದ ಲೆಕ್ಕ ಸುರುಳಿ ಸುರುಳಿ .ತಿಕ್ಕಟ್ದ್ ಪೋತಿನವು. ಅಂಚ ಅಕ್ಲೆಗ್ ನಮಲೆಕ್ಕ ಪೊರ್ಲು ಬರ್ಚಿದ್ ಕುಜಲ್ನ್ ಸೋಕು ದೀಪಿನಲ್ಕನೇ ಇಜ್ಜಿ.ಕೆಲ ಇಚಾರೊಡು ಅಕುಲೇ ಬೇಜರ್ಡ್ ಪನ್ಪೆರ್,ದೇವೆರ್ ಎಂಕ್ಲೆನ್ ಕಪ್ಪು ಕಪ್ಪು ಮಲ್ತೆರ್ ಆಂಡ ಮಲ್ಲೆಜ್ಜಿ. ಆಂಡ ಎಂಕ್ಲೆ ರೂಪೊನೇ ಕುರೂಪ ಮಲ್ತ್, ಕುಜಲ್ನ ಲಾ ಬರ್ಚೆರೆ ಆವಂದಿಲೆಕ್ಕ ಮಲ್ತೆರ್ ಪಂಡ್ದ್!. ಬೇಜರ್ಲಾ ಆಪುಂಡು ಪಾಪ. ಅಂಚಾದ್ ಅಕ್ಲೆ ಅಂಜೊವುಲು ಏಪಲಾ ಕುಜಲ್ ತರ್ತ್ ದೆಪ್ಪುನಿ. ಬೊಕ್ಕ ಪೊಂಜೋವುಲೆ ಮಂಡೆಗ್ ನಾನಾ ನಮುನೆದ ಕುಜಲ್ದ ಟೊಪ್ಪಿ ಪಂಡ 'ಟೋಪನ್'!.
ಯಾನ್ ಪನಿಯೆರೆ ಪಿದಾಡ್ನಿ ... ವಿಷಯ ದಾದ ಪಂಡ ಯಾನ್ ಎಲ್ಲಿಪ್ಪುನಗ ಕುಜಲ್ ಬತ್ತಿ ಕೂಡ್ಲೆ ಇಲ್ಲಡ್ ಪನ್ರೆ ಸುರುಮಲ್ತೊಂತೆರ್..
"ಕುಜಲ್ ಬಾಯಿಗ್ ಜಪ್ಪುಂಡು, ತಿಂದಿನ ಪೂರಾ ನಿನ್ನ ಕುಜಲ್ಗೇ ಪೋಪುಂಡಾಂದ್, ಓಮಯನಡೆ ಪೋದು 'ತರೆ ದೆತ್ತೊಂದು ಬಲ' ಪಂಡ್ದ್. ಸುಮಾರ್ ಸಮಯ ಮುಟ್ಟಲಾ "ತರೆ ದೆಪ್ಪುನಿ" ಪಂದೇ ಪನೊಂತೆರ್. ಒರ ಸಾಲೆದ ಮಾಸ್ಟ್ರ ದಾನ್ನ ಪಂಡೆರ್ "ಎಂತದಾ ತಲೆ ತೆಗೆದರೆ ಮತ್ತೆ ಚಿಗುರುತ್ತದಾ?"ಅಥವಾ ನಿನಗೆ ರಾವಣನ ಹಾಗೆ ಹತ್ತು ತಲೆ ಇದೆಯಾ? ಕೂದಲು ತೆಗೆಯಲು ಹೋದದ್ದು ಎಂದು ಹೇಳು" ಪಂದ್. ಐರ್ದ್ ಬೊಕ್ಕ ಕುಜಲ್ ದೆಪ್ಪಾಯೆರೆ ಪೋಯಿನಿ ಪನೊಂತೆ.
ಎಂಕ್ಲೆ ಊರುಡು ಅಪಗ ಇತ್ತಿನಿ ಒಂಜೇ ಸಲೂನ್. ಅವ್ವೇ ಓಮಯಣ್ಣನ ಇಲ್ಲದ ಬರಿತ ಒಂಜಿ ಕಿದೆಕ್ ತಾಗ್ದ್ ಕಟ್ದಿನ ಒಂಜಿ ಪರ ಕೊಟ್ಯ.ಆರ್ ಬೊಕ್ಕ ಅರೆನ ಬೊಡೆದಿ ಯಮುನಕ್ಕ ಐನಾಜಿ ಜೋಕುಲು ಬೊಕ್ಕ ಅರೆನ ಎರು, ಎರ್ಮೆ, ಪೆತ್ತ ಕೈಕಂಜಿ ಉಂದುವೇ ಅರೆನ ಸಂಸಾರ. ಓಮಯಣ್ಣೆ ಬಾರೀ ಒಂಜಿ ಸೌಮ್ಯ ಸೊಭಾವದ ಎಡ್ಡೆ ನರಮಾನಿ. ಏರೆಡಲಾ ನಿಷ್ಠುರವಾದ್ ಪಾತೆರು ನರಮಾನಿ ಅತ್ತೇ ಅತ್ತ್. ಆರಾಂಡ್ ಅರೆ ಕಸುಬಾಂಡ್. ಐತ ನಡುಟೇ ಅರೆ ಕೈಕಾಂಜಿ ಸಾಗೊಲಿ ಮಾತಲಾ.ಅಪಗ ಕುಜಲ್ ದೆಪ್ಪೆರೆ ಈತೇ ಪಂದ್ ಕಾಸ್ ಇಜ್ಜಿ. ಇಲ್ಲಡ್ ಒಂಜಿ ರುಪಯಿ ಕೊರಿಯೆರ್ಡ ಐಟ್ಲಾ ಓಮಯಣ್ಣನ ಕೈತಲ್ದ ಚೆಯ್ಯ ಬ್ಯಾರಿನ ಅಂಗಡಿರ್ದ್ ಎಣ್ಮಾಣೆದ ಚಿಕ್ಕಿಯಾ, ಕಡ್ಲೆನಾ ತಿನೊಂತ. ಒರಿನ ಎಣ್ಮಾಣೆ ಪಂಡ ಐವ ಪೈಸೆ ಓಮಯಣ್ಣಗ್. ಆಂಡ ಆರ್ ಅವು ಕಮ್ಮಿಯಾಂಡ್ ಪಂದ್ ಏಪಲಾ ಪಂತಿನಾರ್ ಅತ್ತ್. ಅಪಗ ಓಮಯಣ್ಣೆ ಕುಜಲ್ ದೆತ್ತೊಂತಿನಿ ಮಾತ್ರ ಅತ್ತ್. ಊರುಡು ಏರ್ ಸೈತೆರ್ಡಲಾ ಕಟ್ಟ್ ಪಿರ್ಕಾರ ಜಾತಿಕಟ್ಟ್ ದ ಲೆಕ್ಕ ಮಡ್ಡೆಲಾದಿಗೆ ಕರ್ತೊಂತಿ ಮಡಿತ ಮಡ್ಡೆಲೆಲಾ ಆದಿತ್ತೆರ್. ಆರ್ ಏಪಲಾ ಆತ್ ಕೊರಿ ಈತ್ ಕೊರಿ ಪಂದ್ ಪನಾಂದೆ ನಿಷ್ಠೆಡ್ ದೈವದ ಜೀಟಿಗೆದ ಸೇವೆ, ಕೊಡಿಯಾಡಿತ ಸೇವೆ ಮಲ್ತೊಂತಿ ಆನಿದ ಸತ್ಯಾದಿಗೆ.
ಎಂಕ್ ಇನಿಕ್ಲಾ ನೆನೆಪಾಪಿ ಸಂಗತಿ ಪಂಡ, ಅರನಡೆಗ್ ಪೋಂಡ ಒಂಜಿ ಬೆಂಚಿಡ್ ಕುಲ್ಲಾಯೆರ್ಡ ಬೊಲ್ದುದ ಕುಂಟು ಮೇಲ್ಗ್ ಪಾರ್ದ್ ಸುರೂಟು ಕೇನುನ ಪ್ರಶ್ನೆ ಪಂಡ " ಬಾಲೆ ಮಾಮನ ಕಾಕಜಿ ಉಂಡೇ " ಪಂದ್. ಕಾರಣ ಎನ್ನ ಮಾಮ ಬೊಂಬಾಯಿಡ್ ಇತ್ತೆರ್ ಅಪಗ ಕಾಕಜಿದ ಕಾಲ . ಮನಿಯಾರ್ಡರ್ದ ಕಾಲ. ಅಂಚ " ನಾವು ಕ್ಷೇಮ... ನಿಮ್ಮ ಯೋಗ ಕ್ಷೇಮ ತಿಳಿಸುವುದು. ತರುವಾಯ ತಿಳಿಸುವುದೇನೆಂದರೆ ಈ ಸಾರಿ ಮಳೆ ಕಡಿಮೆ ಯಾಗಿದೆ. ಪಳ್ಳಿಯ ಗದ್ದೆಯ ಬೆಳೆ ಅಷ್ಟಕಷ್ಟೆ, ಮಕ್ಕಳು ಶಾಲೆಗೆ ಹೋಗುತ್ತಿದ್ದಾರೆ.ನಮ್ಮ ಮನೆಯ ನಾಯಿ ರಾಜುವಿಗೆ ಹುಷಾರಿಲ್ಲ. ನನಗೆ ಸ್ವಲ್ಪ ಕೆಮ್ಮು ಅಮ್ಮನಿಗೆ ದಮ್ಮು, ನಿನ್ನ ಯೋಗ ಕ್ಷೇಮ ತಿಳಿಸು ಐನೂರು ಕಳಿಸು" ಇಂಚೆನೇ...ಏಪಲಾ ಈತೆ ಮಾಮಗ್ ಎಂಕ್ಲು ಕಾಕಜಿ ಪಾಡುನಿ. ಅಂಚ ಐಕ್ ಪಿರ ಕಾಕಜಿ ಬೊಕ್ಕ ದುಡ್ಡು ಬರೊಂತುಂಡು. ಇಂಚ ಓಮಯಣ್ಣಗ್ ಎಂಕ್ಲೆ ಬಗ್ಗೆ ಆತ್ ಕನಿಕರ,ಎಡ್ಡೆಪ್ಪು. ಅಂಚಾದೇ ಆರ್ ಸುರೂಕು ಈ ಪ್ರಶ್ನೆ ಕೇನೊಂತೆರ್. ಬೊಕ್ಕ ಒರ ಒರ ಮಂಡೆದ ಒಂಜಿ ಮೈತ ಅರ್ಧವಾಸಿ ಕುಜಲ್ ದೆತ್ತ್ಧ್. "ಯಾನ್ ಇತ್ತೆ ಬರ್ಪೆ ಬಾಲೆ ಎರ್ಮೆ ಒಂಜಿ ದೊಂಬುಗು ನುಂಗೊಂದುಂಡು, ಐನ್ ಕನಪೆ ಪಂದ್ ಪೋಯಿನಾರ್ ಅವೆನ್ ಕಂತ್ ಐಕ್ ಅರ್ಕಂಜಿ ದೀನೆರ್ದ್ ಬೊಕ್ಕನೇ ಪಿರ ಕುಜಲ್ ದೆಪ್ಪೆರೆ ಬರ್ಪಿನಿ!. ಅಪಗ ಎಂಕುಲ್ಲಾ ಜೋಕುಲು, ಬೊಕ್ಕ ಅಪಗ ನರಮಾನಿಯಡ್ ತಾಳ್ಮೆಲಾ ಇತ್ತ್ಂಡ್. ಇತ್ತೆದಲೆಕ್ಕ ತುರ್ತುದ ಬದ್ಕ್ ಅತ್ತತ್ತೆ.ಆತತ್ತಂದೆ ಅಪಗ ಓಮಯಣ್ಣಡ ಇತ್ತೆದ ಲೆಕ್ಕಂತಿನ ಜಿಲೇಟ್, ಟೋಪಾಸ್ ಬ್ಲೇಡ್ ಇತ್ತ್ಜಿ. ಅಪಗ ಇತ್ತಿನಿ ಬಿಸತ್ತಿದ ಲೆಕ್ಕಂತಿನ ಪರ್ತೆದ ಬಾಲ್. ಅವೆನೇ ಸಾನೆದ ಕಲ್ಲ್ ಗ್ ಚಿಕೂ ಚಿಕೂ ಪಂದ್ ನೀರ್ ಪಾರ್ದ್ ಗೀಸ್ಧ್ ಅವೆಟ್ಟೇ ಕೆಬಿತಬರಿಟ್ ಪಿರವುಡು ಪೂರಾ ಶೇಪ್ ಕೊರೋಂತಿನಿ. ಇಂಚ ಆನಿದ ಬದ್ಕ್. ಇಂಚಪ್ಪ ಆ ಓಮಯಣ್ಣೆ ತೀರ್ ಪೋಯೆರ್ ಪಂದ್ ಭಾರೀ ಬೇಜಾರ್ ಆಂಡ್...
Article by
ಶರತ್ ಶೆಟ್ಟಿ ಪಡುಪಳ್ಳಿ
ತುಲುವೆರೆ ಕಲ