ಅರಮನೆಯ ಅವಶೇಷದ

ಶಿಥಿಲ ಮೋಟು ಗೋಡೆ

ಬಿಕ್ಕಳಿಸುವ ಸದ್ದು

ಮಹಾರಾಣಿಯ ನಿಟ್ಟುಸಿರು !

ಸ್ಬಯಂವರ ಗೆದ್ದು

ಮೆರವಣಿಗೆಯಲ್ಲಿ‌ ಬಂದು

ಬರವಣಿಗೆಯಿಲ್ಲದೆ

ಎದೆಯಲ್ಲಿ ಸಹಿ ಒತ್ತಿದ !


ಭವ್ಯ ಅರಮನೆ

ತುಂಬು  ಸಂಸಾರ

ಕೋಡಿ ಬಿದ್ದು ಹರಿಯುವ ಪ್ರೀತಿ

ಮೈ ತುಂಬಾ  ವಜ್ರ ವೈಢೂರ್ಯ

ಬಳುಕುವ ಮೈ

ಭಾರವಾಗಿತ್ತು !

ಮಹಾರಾಜನ ಎದೆಗೊರಗಿ

ಸುಖದ ಜೋಕಾಲಿಯಾಡುವ

ಮುದ್ದು ದಿನಗಳು  !


ದೂರದಲ್ಲೆಲ್ಲೋ ರಣ ಕಹಳೆ !

ಗಡಬಡಿಸಿ ಎದ್ದ ಇನಿಯ

ಗಲ್ಲಕ್ಕೆ ಮುತ್ತಿಟ್ಟು

ಖಡ್ಗ  ಸವರಿ

ರಣ ವೀಳ್ಯ ಪಡೆದು

ಹೊರಟೇ ಬಿಟ್ಟ !

ಕಂಕಣ ಕಟ್ಟಲು

ಮರೆತಳು ಮಡದಿ !

ವಿರಹದ ದಿನಗಳು

ದೇವರ ಮನೆಯಲ್ಲಿ !


ಮಂಗಳ ವಾದ್ಯಗಳು !

ನಲ್ಲ ಮರಳುತ್ತಿದ್ದಾನೆ 

ಗೆದ್ದ ಸಾಮ್ರಾಜ್ಯ

ಬೊಕ್ಕಸದೊಡನೆ !


ಸಖಿ ಸಿಂಗರಿಸಿದಳು

ಬಾಡಿದ ಮುಡಿಯ

ಮಂಗಳಾರತಿಯೊಡನೆ

ಮುಸುಕು ಸರಿಸಿ

ರಾಜನಿಗೆ ತಿಲಕವಿರಿಸಿ

ಹೊಸಲೊಳಗೆ ಬರಲು

ಸಮ್ಮತಿಸಿದಳು


ಇನಿಯನ ಜೊತೆ

ಇನ್ನೆರಡು ಪಾದಗಳು !

ರಾಜ ಗೆದ್ದು ತಂದ

ಹೆಣ್ಣು ಪಾದಕ್ಕೆರಗಿ

"ಅಕ್ಕಾ"  ಎಂದಳು !!


ಹೊಸತು ಹಳತಾಗಿ

ಹಳತು ಕೊಳೆತು

ಅರಮನೆ  ತುಂಬಾ

ರಾಣಿಯರು !!

ಮಹಾರಾಣಿಯ ಹೃದಯದರಸ

ಈಗ ಹಲವು ರಾಣಿಯರ ದಾಸ  !

ಅರಮನೆಯ ಪಳಿಯುಳಿಕೆಗಳಲ್ಲಿ

ಮಹಾರಾಣಿ

ಬದುಕಿದ್ದಾಳೆ

ಶಾಂತಿ ಕ್ರಾಂತಿಯ

ಕಹಳೆಯೂದುತಾ ...


-  ವೈಲೆಟ್ ಪಿಂಟೋ, ಅರಸೀಕೆರೆ.