ವರ್ಸದ ಪದ್ರಾಡ್ ತಿಂಗೊಲುಲೆಗ್ ತುಲುನಾಡ್ ಡ್ ತುಲುವೆರ್ ಬೇತೆನೆ ನಮೂನೆದ ಪುದರ್ ದೀತೆರ್. ಅವು ಪಂಡ ಪಗ್ಗು, ಬೇಶ, ಕಾರ್ತೆಲ್ ,ಆಟಿ,ಸೋಣ,ನಿರ್ನಾಲ್,ಬೊಂತೆಲ್ , ಜಾರ್ದೆ, ಪೆರಾರ್ದೆ,ಪೊನ್ನಿ, ಮಾಯಿ, ಸುಗ್ಗಿ. ತುಲುವೆರೆನ ಲೆಕ್ಕೊಡು ಪಗ್ಗುದ ಸಿಂಗುಡೆದಾನಿ ಸುರು ಆಪುನ ವರ್ಸ ಸುಗ್ಗಿದ ಸಂಕ್ರಾಂತಿದಾನಿ ಅಕೇರಿ ಆ ಪುಂಡು . (ಇಂಗ್ಲೀಷ್ ದ ಎಪ್ರಿಲ್ ಡ್ಡ್ ಮಾರ್ಚ್ ಮುಟ್ಟ) . ಸಿಂಗುಡೆಡ್ದ್ (ಸಂಕ್ರಾಂತಿದ ಮನದಾನಿ ) ಸಂಕ್ರಾಂತಿ ಮುಟ್ಟ ಒಂಜಿ ತಿಂಗೊಲು ಪಂದ್ ತುಲುವೆರೆನ ಲೆಕ್ಕಾಚಾರ. ಪಿರಾಕ್ ದ ಕಾಲೊದ್ದು ಲಾ ತುಲುನಾಡ್ ಡ್ ಆಟಿ ತಿಂಗೊಲುಗು ಬಾರಿ ಇಸೇಸ ವಾಯಿನ ಪಟ್ಟ ಕೊರ್ತೆರ್. ನಮ್ಮ ಪೆರಿಯಕುಲು ಉಂದೆನ್ ಬಜೀ ತಿಂಗೊಲು ಪಂದ್ ಎನ್ನಂದೆ ಒಂಜಿ ಆಚರಣೆದಲಕ ನಡಪಾವೊಂದು ಬತ್ತ್ ದೆರ್. ಬುಡಂದೆ ಬರ್ಪಿನ ಬಾರಿ ಬರ್ಸಿದ್ದಾವ್ರ ಬೆನ್ನಿ , ಸಾಗೋಲಿ ದ ಬೇಲೆ ಇಜ್ಜಂದೆ ಒಂಜಿ ಪೊರ್ತುದ ವನಸ್ ಗ್ ಲಾ ಬಂಗ ಬರೊಂದಿತ್ತಿನ ಪೊರ್ತು ಅವು . ಇಂಚಿತ್ತಿ ಕಷ್ಟದ ಪೊರ್ತುಡು ಒವ್ವೇ ನಮೂನೆದ ಎಡ್ಡೆ ಲೇಸ್ ನಡಪೆರೆ ಸಾಧ್ಯ ಇಜ್ಜಾಂಡ್. ಅನಿ ಸುರು ಆಯಿನ ಈ ಕಟ್ಟ್ ದಲೆಕನೆ ಇನಿಕ್ ಲಾ ಆಟಿ ತಿಂಗೊಲುಡು ವಾ ಲೇಸ್ ಲಾ ನಡತೊಂದಿಜ್ಜಿ. ಆಟಿ ತಿಂಗೊಲು ಒವ್ವೇ ಲೇಸ್ ಗ್ ಎಡ್ಡೆ ಅತ್ತ್ ಪಂದ್ ತುಲುವೆರೆನ ನಂಬೊಲಿಗೆ. ಕಿರಿ ಕೀಟ್ ದ್ ಬರೊಂದಿತ್ತಿನ ಬರ್ಸಗ್ ಪುಡಮಿ ಡ್ ನಾನಾ ನಮೂನೆದ ಉಮಿಲ್ ,ಪಾಂತೆ ಬೊಕ ಇಸ ಜಿಂಜಿನ ಪುರಿಕುಲು ಪುಟ್ಟೊಂದಿತ್ತ್ಂಡ್. ಮಣ್ಣ್ ಡ್ ನಂಜಿದ ಅಂಸ ಜಾಸ್ತಿ ಆವೊಂದಿತ್ತ್ಂಡ್. ಪೆರಿಯ ಕುಲೆನ ಪಾತೆರದಲಕ ಪನ್ಪುನಾಂಡ " ಆಟಿಡ್ ನಕ್ಕುರು ಲಾ ಮರಿಟ ಪೊಣ್ಣು ಕೇನ್‌oಡ್ ಗೆ " . ಪಂಡ ನಕ್ಕುರು ದ ಮೈಟ್ ಲಾ ಉಚ್ಚುದಾತ್ ಇಸ ಇಪ್ಪೆದ್ಂಡ್ ಗೆ. ಇಂಚಿತ್ತಿ ಪೊರ್ತುಡು ಬಿತ್ತಿಲ್ದ ಸೊತ್ತುಲೆನೇ ಮರ್ದ್ ದಲಕ ಗಲಸೊಂದಿತ್ತೆರ್. ಚೇವು ದ ಚೇಟ್ಲಾ,ಪತ್ರೊಡೆ, ಸಾಂತನಿ, ಬಾರೆದ ದಂಡ್, ಪೂಂಬೆ, ಕನಿಲೆ,ಲಾಂಬು, ತಜಂಕ್ ಇಂಚ ನಾನಾ ನಮೂನೆದ ತೆನಸ್ ಲೆಡ್ ಬಂಜಿ ಜಿಂಜಾ ವೊಂದಿತ್ತೆರ್. ಆಟಿಡ್ ಅಪರೂಪ ಗ್ ದೊಂಬು ಕಾಯಿಂಡ ಆನೆದ ಬೆರಿ ಬುಡವು ನಾತ್ ಉರಿ ದೊಂಬು ಇಪ್ಪೆದ್ಂಡ್ ಗೆ . ಆಟಿದ ಅಮಾಸೆದಾನಿ ಪಾಲೆದ ಮರತ ಕೆತ್ತೆ ದ ಕಸಾಯ ಮಂತ್ ದ್ ಪರ್ಂಡ ವಾ ಸೀಕ್ ಲಾ ಬರ್ಪು ಜಿಂದ್ ನಂಬೊಂದಿತ್ತೆರ್. ಪುಲ್ಯ ಕಾಂಡೆ ಪೋದು ಕಲ್ಲ್ ಡ್ ಗುದ್ದ್ ದ್ ಕೆತ್ತೆ ದೆಪ್ಪೊಡುಂದ್ ಪನ್ಪೆರ್ . ಉಂದೆತ ಪಿರವು ಇಪ್ಪುನ ವಿಜ್ಞಾನ ದಾದ ಪಂಡ ಪಾಲೆದ ಮರಕ್ ತೆಡಿಲ್ ನ್ ಒಯ್ಪುನ ಇಸೇಸ ಸಕ್ತಿ ಉಂಡು. ಅಂಚಾದ್ ಕರ್ಬದ ಕತ್ತಿದ ಬದಲ್ ಕಲ್ಲ್ ಎಡ್ಡೆ ಪಂದ್ ಆಲೋಚನೆ ಮಂತ್ ದೆರ್.
ಆಟಿ ತಿಂಗೊಲುಡು ದೈವೊಲ್ ಗಟ್ಟ ಮಿತರುವ ಪನ್ಪಿನ ಪಾತೆರದಲಕ , ಈ ಒಂಜಿ ತಿಂಗೊಲು ದೈವೊಲೆಗ್ ಒವ್ವೇ ರೀತಿದ ಅಗೇಲ್, ತಂಬಿಲ ಇಜ್ಜಂದೆ ಸಾನೊಲೆದ ಬಾಕಿಲ್ ಪಾಡ್ದ್ ಇಪ್ಪುವೆರ್. ತುಲುವೆರೆನ ಬದ್ಕ್ ದ ಬೆರಿಸಾಯ ಆದುಪ್ಪುನ ದೈವೊಲು ಇಜ್ಜಂದೆ ಎಂಕುಲೆಗ್ ಏರ್ ದಿಕ್ಕ್ಂದ್ ಎತೆ ದೆಪ್ಪುನಗ ಯಾನುಲ್ಲೆ ಪಂದ್ ಇಲ್ಲ್ ಇಲ್ಲಗ್ ಪೋದು ನಿಕಲೆನ ಸೀಕ್ , ಸಂಕಟ ನ್ ದೂರ ಮಲ್ಪುವೆಂದ್ ಬಾಮಿತ್ ದ್ ಉಡಲ್ ಡ್ ಗೆಲ್ಮೆನ ಜಿಂಜಾವುನಾಯೆನೇ ಆಟಿ ಕಳೆಂಜೆ. ಕಾಯ ಬುಡ್ತಿನ ನಮ್ಮ ಪೆರಿಯಕುಲೆಗ್ ಆಟಿಡ್ ಅಗೇಲ್ ಬಲಸುನ ಕ್ರಮ ಉಂಡು. ಅಂಚನೇ ಆಟಿ ತಿಂಗೊಲುಡು ಮಾತ್ರ ಗೊಬ್ಬುನ ಒಂಜಿ ಗೊಬ್ಬು ಪಂಡ ಚನ್ನೆಮಣೆ ಗೊಬ್ಬು. ಆಟಿದ ಬರ್ಸಗ್ ಇಲ್ಲದ ಉಲಾಯಿಡೆ ಕುಲೊಂದು, ಅಟ್ಟಡ್ ದೀತಿನ ಚನ್ನೆದ ಮಣೆನ್ ದೆತ್ತ್ ದ್ ಗೊಬ್ಬುವೆರ್. ಉಂದೆನ್ ಪಲಿ ಸಂಗಡಿ, ಮೆಗ್ಯೆ ಪಲಾಯೆ ಗೊಬ್ಬೆರೆ ಬಲ್ಲಿ ಲಡಾಯಿ ಆಪುಂಡು ಪಂದ್ ದುಂಬು ನಡತ್ ದಿನ ಕತೆಕುಲೆದ್ದ್ ತೆರಿದ್ ಬರ್ಪುಂಡು. ಆಟಿ ತಿಂಗೊಲು ಮುಗಿಲೆಕ್ಕನೇ ಈ ಮಣೆ ಪಿರ ಪೋದು ಅಟ್ಟಡೇ ಕುಲ್ಲುಂಡು.
ಪೊಸತ್ ಮದಿಮೆ ಆಯಿನ ಪೊಣ್ಣನ್ ಆಟಿಡ್ ಅಪ್ಪೆ ಇಲ್ಲಡೆ ಲೆತೊಂದು ಬರ್ಪುನ ಕ್ರಮ ತುಲುನಾಡ್ ಡ್ ನಡಪುಂಡು. ಬಾರಿ ಬಡಪತ್ತ್ ದ ಆ ಪೊರ್ತುಡು ಎನ್ನ ಮಗಲೆಗ್ ಮಾಮಿಲ್ಲಡ್ ಸಮಕಟ್ಟ್ ತೆನಸ್ ತಿಕ್ಕುವಾ , ಎನ್ನ ಕೈತಲ್ ಇತ್ತು ದುಂಡ ಎನ್ನ ಪಾಲ್ ದ ತೆಲಿ ನ್ ಆಂಡಲಾ ಕೊರ್ತುವೆ ಪನ್ಪಿನ ಅಪ್ಪೆನ ಉಡಲ್ದ ಬೇನೆ ನ್ ತೆರಿಯೊಂದು , ಆಟಿಡ್ ಮಾಮಿ ಆಯಿನಾಲ್ ಮರ್ಮಲೆನ ಮೋನೆ ತೂಂಡ ಮಾಮಿ ನ ಕಣ್ಣ್ ಪುಡವುಂಡು ಪಂದ್ ನಂ ಬಾದ್ ಮಾಮಿನ ಕೈದ್ದ್ ಬುಡುಗಡೆ ಕೊರೊಂದಿತ್ತೆರ್. ಉಂದೆತ ಪಿರವು ಇಪ್ಪುನ ನನೊಂಜಿ ಕಾರಣ ಪಂಡ , ಪೊಸ ಕಂಡನಿ ಬುಡೆದಿ ಈ ಪೊರ್ತುಡು ಒಟ್ಟಿಗೆ ಇತ್ತ್ಂಡ, ಪಗ್ಗು, ಬೇಶ ಗ್ ಒರುಂಬ ತಿಂಗೊಲು ಜಿಂಜಿದ್ ಆ ಉರಿ ಸೆಕೆ ಟ್ ಕಷ್ಟ ಅವುಂದು ಅಕಲೆ ನ ಆಲೋಚನೆ.
ಇಂಚ ಈ ಕಟ್ಟ್ ಲ್ ಪೂರಾ ತುಲುವೆರೆನ ಉಡಲ್ ಡ್ ಅಳಿ ದಾಂತಿನ ನೆಂಪುಲಾದ್ ಜಾಗ ದೆತೊಂದ. ಇನಿ ಪೇಟೆ ಡ್ ಪೂರ ಆಟಿಡೊಂಜಿ ದಿನ ಪಂದ್ ಬಾರಿ ಗಮ್ಮತ್ ಡ್ ಆಚರಣೆ ಮನ್ಪುವೆರ್. ಉಂದು ಕಾಲಿ ಪರ್ಬದಲಕ ಆವಂದೆ ನಮ್ಮ ಪೆರಿಯಕುಲೆಗ್ ಲಾ ಪಸಂತ್ರ ಗ್ ಲಾ ಇತ್ತಿನ ಪಿರ್ತಿದ ಸಂಬಂಧ ದ ಬಗೆಟ್ ಗೇನ ಪುಟ್ಟುಲೆಕ ಆವೊಡು. ಬಿತ್ತಿಲ್ ದ ಸೊತ್ತುಲೆನ್ ತೂದು ಕಣ್ಣ್ ಜಿಂಜೊಡು, ರುಚಿ ತೂದು ಉಡಲ್ ತಂಪಾವೊಡು. ಅಪಗ ಮಾತ್ರ ನನಲಾತ್ ವರ್ಸ ಈ ಕಟ್ಟ್ ಲ್ ಪೂರಾ ಒರಿಯೊಂದು ಬರಿಯೆರೆ ಸಾಧ್ಯ.
ಶ್ವೇತಾ ಅಮೈ
ತುಲುವೆರೆ ಕಲ