01ಸ್ವೊಪನ
ಸ್ವೊಪ್ನಾಂತು ಪುಣಿ ಏಕ್ವಳೆ
ಆಮ್ಗೆಲೆ ಘರಾ ವಚೂನ್ ಯೇವ್ಕಾ.
ಗುಡ್ಡೆ ವಯ್ಲೆ ತೇ ಘರ
ವಣ್ತ್ಯೊ, ಹೋಡ್ ಹೋಡಿ ಕಂಡ್ಯೊ.
ವಿಸ್ಕಳ ಕೂಡ.
ಆಪೋಣ್ ಆಪೋಣ್ ಪೋಳೊಕಾ.
ವಾಟ್ಟೇರಿ ಮೆಳ್ಚಿ ಕಲ್ಲುರ್ಟೀಕ
ಏಕು ನಮಸ್ಕಾರು ಘಾಲ್ಕಾ.
ಶಿವಪ್ಪಾ ತಂಚೆ ಬಾಂಯ್ತು
ನಿಲ್ಕುನು ಪಳೋಕಾ.
ನೆಕ್ಕರೆ ಆಂಬುಲಿ ಪಳ್ಳೇರಿ
ವೆಂಚುನು ಗವ್ನಾಕ ಪುಸೂನು ಖಾವ್ಕಾ.
ವಾಸರೇಂತು ತಾನ್ನಿ ಕಾಮ ಕರ್ತಾ
ಆಸ್ಲೇರಿ ಉಲ್ಲೋವ್ನು ಯೇವ್ಕಾ.
ತಶೀ.. ಪೊಸಳ್ಳಿಂಚಾಲೆ ರುಕ್ಕಾರಿ
ಪಣಸು ಪಿಕ್ಲಾವೇ? ಪೊಳೊಕಾ
ಪಣ್ಸಾ ಮುದ್ದೊ ಕೊರ್ನು
ಆಶಿ ಭರೀತ ಖಾವ್ಕಾ.
ಏಕ್ ಕಳ್ಸೊ ಉದ್ದಾಕ
ಕುರ್ಟಾರಿ ದವೊರ್ನು.. ಹಳೂ
ಗುಡ್ಡೊ ಚೋಣು ವಚೂಕಾ.
ಘರಾ ಭಿತ್ತರಿ ಗೆಲ್ಲೆ ಸತಾಂ
ಹೋಡಾನ ಪದ ಮೋಣ್ಕಾ
ಪಾಯ್ಂಜಣ ಶಬ್ದು ಕರ್ತಾ ಚಿ
ದಿಗೀ ಫಾಂತಿ ದೊಲ್ಲಯ್ತ
ಸಗ್ಳೇ ಘರ ಭೋಂವ್ಕಾ..
ಕೋಣ್ ಕೀ ಆಯಿಲೆ ಶೆ
ದಿಸ್ತಾ ಮೊಣು
ಬಾಗ್ಲಾ ಆಡ ರಾಬ್ಬುನು ಭೌ
ಮೊಣು ಭಿವೋಕಾ.
ಹೋಡಾನ ಆಮ್ಮಾ ಮೋಣು
ಆಪೋವ್ಕಾ.
ಆಮ್ಮಾಲೆ ತೋಂಡ ಪಳಯ್ತಾ
ಬಯ್ಸುಕಾ.
ಗಟ್ಟಿ ಪೊಟೋಳ್ನ್ ಧೋರ್ನು
ಮನ ಭರ್ನು ಖೂಬ್ ರೋಡ್ಕಾ.
ಭರ್ನು ಜಡ ಜಾಲ್ಲೆಲೆ ಮನ
ಏಕ್ ವಳೆ ಹಗೂರ ಕೋರ್ನು ಘೆವ್ಕಾ.
ಮಾಗಿರಿ ಉಟಾನು ತೋಂಡ ಧೂವ್ನು
ತೇ ಕೂಡಾಂತುಲಿ ಹೋಡಿ ಕಾನ್ನಡಿಂತು
ನಮೂನ್ವಾರ್ ತೊಂಡ ಕೋರ್ನು.
ಹಾಂವೆ ಹಾಸುಕಾ. ಹಾಂವೇ ಹಾಸುಕಾ.
ಹೋಡ್ಗುನ ಗೆಲ್ಲೆಲೆ ಮಾಕ್ಕಾ
ಹಾಂವೆ ಸೊದ್ದುಕಾ.
ಕಾಜ್ಜು ರುಕ್ಕಾ ಮುಳಾಂತು
ಬೆಡ್ಸಾ ರುಕ್ಕಾ ಗೆಲ್ಲೇರಿ ವಾಚೂನು
ಬಶಿಲೆ ಮಾಕ್ಕಾ ಹಾಂವೆ ಸೊದುಕಾ.
02ಮುಕಾವಯ್ಲೆ ಕಾಂಬೆ ಲಾಗ್ಗಿ
ಸುಂದರ ಗುಡ್ಯಾ ಮಧ್ಯೇಂತು
ರಸ್ತೊ ಮೊಡ್ಚೆ ವಾಟ್ಯೇರಿ
ತೂಂ ಆನಿ ಹಾಂವ
ಚಮ್ಕತಾ ಆಶಿಲಿಂ.
ದೂರ ..ದೂರ.
ವೇಳ ಕಾಳ ಪಳಯ್ನಾತಿಲೆ.
ಚಲ್ತಾ ಚಲ್ತಾ ಮ್ಹಾಕಾ
ವಾಂವ್ಟ್ ಯೆತ್ತಾಲೆ.
ಉಡ್ಗಾಸ್ ಆಸ್ವೇ ತುಕಾ.
ತೂ ಮಾಕಾ ಸಾಂಗ್ತಾಲೊ
ಮೋಗಾನ ಹಳೂಚಿ.
ಆನಿ ಚಿಕೆ.. ದೂರ..
ಮುಕಾ ವೈಚೆ ಕಾಂಬೆ ಲಾಗ್ಗಿ.
ಹೂಂ ಮ್ಹಣೂನ ಹಾಂವ
ಚಮ್ಕತಾಲಿ ತುಗೆಲೊ
ಹಾಥ ಧರೂನ.
ಆಜಿ ಹಾಂವ ಚಲ್ತಾ ಆಸ್ಸ
ತೇಚಿ ವಾಟ್ಯೇರಿ, ಎಕ್ಲೀಚಿ.
ವಾಟ್ಯೆ ವಯ್ಲೆ ಕಾಂಬೆ
ಪಳಯ್ತಾ ತಿ ಮಾಕ್ಕಾ
ತುಗೆಲ್ ಬದಲ ನಿಮ್ಗಿತಾ ತಿ.
ಪಾಯ್ಯಾ ವಾಂವ್ಟ್ ಆಯ್ಲೆ..
ಮೋಗಾನ ಹಾಥ ಧರೂನ
ಚಲಾವ್ಚಾಕ ತೂಂ ನಾ.
ಜಾಲ್ಲೇರಿಯ್ ರಾಬನಾಶಿ
ಚಮ್ಕತಾ.. ಹಾಂವ.
ಮುಖಾವೈಲೆ ಕಾಂಬೆ ಲಾಗ್ಗಿ
ತೂ ಆಸ್ಚಾಕ್ ಪುರೊ.
ರಾಕ್ಕೂನ ರಾಬೂನು.
ಮಾಕಾ ಮೇಳೂಕ ಪುರೊ.
ಮಳೆಲೆ ಆಶೇನ.
ವಗಿ ವಗ್ಗಿ ಚಮ್ಕುಚೊ
ಅಭ್ಯಾಸ ನವೆ ತುಕಾ.
03ಸಾಂಜ್ ಜಾತ್ತನಾ
ಕಾಳೋಕು ಹಳೂ ಮಾಂಡ್ತನಾ
ಚಾನ್ನಿಣ್ಯಾ ಉಜ್ವಾಡಾಕ
ಹಾಂವ ದೆಂವ್ತಾ ಹಳೂ
ಚಿತ್ರಾಂತುಲೆನ..ಭೂಂಯ್ಚೇರಿ.
ಕೇಸ್ ಫಾಪುಡ್ತನಾ
ಮಳ್ಬಾಚೆ ನಕ್ಷತ್ರ ಸಗ್ಳೇ
ಶಿಂಪೂನು ಝಗ್ ಝಗೇತಾ.
ಆಂಗಾಚೋ ಪರಮಳು
ಪಸರ್ತನಾ..
ಹಜ಼ಾರ ಚಾಂಪೆಚೆ ಫೂಲ್ಲಂ
ಫುಲ್ತನಾ..
ದೊಳೇ ತಡ್ಯೇರಿ ಬಶಿಲೊ
ಏಕು ಸೊಪ್ಣಾಚೊ ಕುಡ್ಕೊ
ಕೆದಳ್ ಕೀ ಪಳಯಿಲೊ
ತುಂಟುನು ಸಕಲ ಪಡ್ತಾ.
ರಾತ್ ಭರಿ ಹಾಂವ
ಗಾಯ್ತಾ.. ನ್ಹಾಂತಾ.
ಪಾಯ್ಯಾ ವಾಂವ್ಟ್ ಯೆವ್ಚೆ
ಥಾಂಯ್..
ರಾಬ್ಬನಾತ್ತಿಲೆ.
ಫಾಲ್ಲೆ ಜಾಲ್ಲೆ. ಸೂರ‍್ಯು
ಉದೇವ್ಚೆ ವೇಳಾರಿ
ಕೇಸ್ ವಿಂಡೂನ,
ಪರ್‌ಮಳು ಭಾಯರ್
ಯೇನಾತಶಿ
ವರ‌್ಲ್ ಪಾಂಗರೂನ ಗೆತ್ತಾ.
ಸೊಪ್ಣಾ ಚೊ ತೊ ಕುಡ್ಕೊ
ವಚೂನ ದೋಳೆ ತಡ್ಯೇರಿ ಬಸ್ತಾ.
ಹಾಂವ ಪರತೂನ
ಚಿತ್ರಾಂತುಲಿ ಚೆಲ್ಲಿ ಜಾತ್ತಾ.
ತೂ ಯೆತ್ತಾ ಸದಯ್ ಆಯಿಲೆ ವರಿ
ಚಿತ್ರಾ ವೈಲಿ ಧೂಳ್ ಪುಶಿತಾ.
ಆನಿ ಚಮ್ಕತಾ ಮುಕಾರಿ.
ದುಸ್ರೆ ಚಿತ್ರ ಪುಸುಚಾಕ.
ಆಜ್ ಯ್ ದಿಸನಿವೆ ತುಕಾ...?
ಚಿತ್ರಾಂತುಲಿ ಚೆಲ್ಯೆಲೊ
ವ್ಹಂಟಾ ವಯ್ಲೊ ಹಾಸು
ಆನಿ... ಬಾವುನ ನೆಲಾರಿ
ಪಳ್ಳೆಲೆ ದೋನಿ ಚಾಂಪೆ ಚೆ ಫುಲ್ಲಂ.
-ಶೀಲಾ ಭಂಡಾರ್ಕರ್