ಕಂಡನಿ ಕರಿದ್ ಪೋತ್ನ ಪೊಂಜೊವು ಲೀಲಗ್ ಅರ್ತಿಗ್ಲಾ ಪಿರ್ತಿಗ್ಲಾ ಒರ್ಯೆ ಮಗೆ ಕಾಂತು. ಅಮ್ಮೆದಾಂತಿ ಮಗನ್ ಬೆಂದ್ ಸೊಂದುದು ದಾಲ ಕೊರತೆ ದಾಂತೆ ಸಾಂಕೋಂದಿಪ್ವಲ್ ಲೀಲ. ಕೊರತೆದ ಗಂದಗಾಲಿದಾಂತೆ ಕೊಂಡಾಟಡ್ ಬುಲೆಯಿ ಕಾಂತುಗು ಬೆಂಗ್ ಬೇನದ ಅನ್ಬಗೊಂತೆ ಕಡಮೆಂದೇ ಪನೊಲಿ. ಲೀಲ ಬೆಂದ್ ಸೊಂದುದ್ ಬಚ್ಚಿದ್ ಬತ್ತೋಲ್ಂಡಲ ಅಪ್ಪೆ ಮಲ್ಪುನ ಇಲ್ಲಲ್ದ ಬೇಲೆಡ್ ಅಕ್ರಂದ ಕಡ್ಡಿ ಅಂಚಿಂಚಿ ದೀವಯೆ ಮಗೆ ಕಾಂತು. ಒರೋರ ಲೀಲ "ಒರುಂಬ ತಿಂಗೊಲು ತುಂಬುದು ಪಿರನ ಕಡ್ಯುನ ಬೇನೆ ನಿಂಗ್‌ದ್ ನಿನನ್ ಪೆದ್ದ್‌ದದೆ ದಾಯೆಗೋ ಪಂದ್ ಬೇಜಾರ್ಡ್ ಪರೇಂಚೋನ್ನಗ "ಅಂದಂದ್ ಈರ್ ಪನ್ಪರಪ್ಪೆ ಆಂಡ ಅವು ಏತ್ಸತ್ಯಂದ್ ಯಾನೆಂಚ ನಂಬುನಿಂದ್ ಉರ್ಯುನಡೆ ಉಪ್ಪು ಒರೆಂಕಾವೋಂದಿತ್ತೆ ಕಾಂತು.ಇಂಚನೇ ಕಾಲ ದುಂಬರಿನಗ ಆನ್ ಪೋದು ಅಂಜೊವು ಆಯಿನ ಕಾಂತುಗು ಅಪ್ಪೆ ಲೀಲ ಅಕ್ಕು ಪನ್ಪಿ ಪೊನ್ನನೊಟ್ಟುಗು ಮದ್ಮೆ ಮಲ್ತ್ ದ್ ತರೆತ ಪುದೆನ್ ಮರ್ಮಲೆನ ತರೆಕ್ ಪತ್ರ್‌ದ್ ಪಿರಯ ಕರಿ ಲೀಲ ಒಂಜಿರ್ಲ್ ದೇಬೆರೆ ಪಾದ ಸೇರ್ವಲ್. ಅಪ್ಪೆ ಕರಿಬೊಕ್ಕ ಗುಡ್ಚಿಲ್ ಬೊಡೆದಿ ಸಂಸಾರ ಪನ್ಪಿ ಜಬಾದಾರಿದ ದುನ್ನ ಕಾಂತುಗು ಅರ್ಥಾವರ ಸುರಾಂಡ್. ಇಂಚೆನೇ ಕಾಲ ದುಂಬರಿನಗ ಕಾಂತುನ ಬೊಡೆದಿ ಅಕ್ಕು ಬಂಜಿನಾಲಪಲ್.
ತಿಂಗೊಲೊಂಜಿ ರಡ್ಡ್ ಪಂಡಿಲೆಕೋನೆ ಕಾಂತುನ ಬೊಡೆದಿ ಅಕ್ಕುಗು ಪೊರ್ತೆಲಾದ್ ಒಂಜಿ ದಿನ ಪೆದ್ಪಿ ಬೇನೆ ಸುರ್ವಾಪುಂಡು.ಮೂಜಿರ್ಲ್ ಪಗೆಲ್ ಬೇನೆ ತಿಂದ್ನ ಕಾಂತುನ ಬೊಡೆದಿ ಅಕ್ಕು ಪೊನ್ನುಬಾಲೆಗ್ ಜಲ್ಮ ಕೊರ್ಪಲ್ ಆಂಡ ದಾನ್ನ ವಿಧಿಲೀಲೆ.ಕಾಂತುನ ಬೊಡೆದಿನ್ ಪೆದ್ಪವರ ಬಯಿದ್ನ ಪೇತಪ್ಪೆ "ಕಾಂತು ತಮೆಲಿ ನೆತ್ತೆರ್ ಕಟ್ಟುನ ತೋಜುಜಿ ಇಂಚೆನೆ ಆಂಡ ಅಕ್ಕುನ ಪಿರನಗೇ ಕುತ್ತುಂಡು ಈ ನಂಬಿಂಚಿ ದೈವದೇವೆರೆನ್ ಅಕ್ಕುನ ಪಿರನ ಒರ್ತು ಕೊರ್ಲೆಂದ್ ಬಗ್ತಿಡ್ ಸುಗಿಪು ಮಾರಾಯಂದ್ ಪನ್ಪೆರ್.ಪೇತಪ್ಪೆ ಪಂಡಿನ ಕೇಂದ್ ಕಾಂತುಗು ತೆಡ್ಲ್ ತರೆಕ್ ಹಾಕಿಲೆಕಂದಿ ಅನುಬಗಾದ್ ಅಡೇಗೆ ಗೋಡೆಗ್ ಪೀಂಕನ್ ಊರ್ದ್ ಬೆರಿಜಾರಾದ್ ನಿಲಟ್ ಚಕ್ಕಂದ್ ಕಲ್ಲುದು ಕನ್ಮುಚ್ಚಿನಗ ಅಪ್ಪೆ ಆನಿ ಪಂತಿ ಪಾತೆರ ನೆಂಪಾದ್ ಕಡೆಕನ್ನ್‌ಡ್ ದಾರೆದಲೆಕ ಕನನೀರ್ ಜಪ್ಡವೋಂದ್ "ಅಂದಪ್ಪೆ ಆನಿ ಈರ್ ಪಂತಿ ಪಾತೆರ ಸತ್ಯಂದ್ ಎಂಕಿನಿ ಅನ್ಬಗಾಂಡ್ ಆನಿರೆನ ಪಾತೆರ ದಂಟಿನೈಕ್ ಎನನ್ ಇನಿ ಮಾಪು ಮಲ್ಪುಲೆ ಈರ್ನ ಮರ್ಮಲೆನ ಪಿರನ ಕಾತ್ಕೊರ್ಲೆ ಅಪ್ಪೆಂದ್ ಉಡಲ್ಡೇ ಬಗ್ತಿಡ್ ಅಪ್ಪೆಡ ನಟ್ಟುವೆ.ದಾದ ಚೋದ್ಯಾಂಡ ದಾನ್ನ "ಕಾಂತು ಅಕ್ಕುನ ತಮೆಲಿ ನೆತ್ತೆರ್ ಕಟ್ಟ್ಂಡ್ಯಾಂದ್ ಪನ್ಪೆರ್ ಪೇತಪ್ಪೆ. ಅವೆನ್ ಕೇನ್ಯ ಕಾಂತು "ಸ್ವಾಮ್ಯಪ್ಪೆ ನನ ಎನ್ನ ಸಯಿರೊಡು ಸುಯಿಲಿಪ್ಪುನೆಟ ಪೊನ್ನ ಸಂಸಾರನ್ ಸಸಾರ ದಿಟ್ಟಿಡ್ ತೂವಯೆ ಉಂದು ಈರ್ನಾಜಂದ್ ಉಡಲ್ಡೇ ಅಪ್ಪೆನ್ ಸುಗಿತ್ ನಟ್ಟುವೆ.ಇತ್ತೆ ಕಾಂತುನ ಪೊರ್ಲ ಸಂಸಾರಡ್ ಅಪ್ಪೆ ಲೀಲನೇ ದೇವೆರ್.
ಕತೆತ ನೀತಿ: ಪೆದ್ದಿ ಅಪ್ಪೆ ಅಮ್ಮೆರ್ನ ಬೇನೆ ಬೆಂಗ್ ಬೆಸರ್ನ್ ಜೋಕುಲೇಪಲ ಸಸಾರ ಮಲ್ಪರ ಬಲ್ಲಿ ಪನ್ಪುನ ಸಾರ
✍️ಆರ್ಯನ್ ಸವನಾಲ್
ತುಲುವೆರೆ ಕಲ