ಮಾತೆರೆಗ್ ಸೊಲ್ಮೆಲು

ಈ ಇಚಾರ ನಿಕ್ಲೆಗ್ ತೆರಿದುಂಡೇ?. ತೆರಿದಿತ್ತ್ಂಡಲಾ ಕುಡೊರ ಓದುಲೆ..

ಇಡೀ ಪ್ರಪಂಚೊಡು ಜಾಸ್ತಿ ಮರ ಕಡ್ಪೆರೆ ಮಲ್ಲ ಕಾರಣ ಪಂಡ ಕಾಕಜಿಗೆ!. ಕಡ್ತಿನ ಮರತ 35 % ಮರ ಉಪಯೋಗ ಆಪಿನಿ ಈ ಪೇಪರ್ದ ತಯಾರಿಕೆಗ್.ಐಟ್ಲಾ ಮಲ್ಲ ಪಾಲ್ ನಮ ಇನಿಕೋಡೆಡ್ ಪೂರೆಕ್ಕ್ ಲಾ ಗಲಸುನ ಟಿಶ್ಯೂ ಪೇಪರ್ಗ್.ಐನ್ ಕೈ ಒಚ್ಚಿದ್ ಔಲು ಮೂಲು ದಕ್ಕುವ, ಅತ್ತಾಂದೆ ದಾದಾಂಡಲಾ ಗುತ್ತುಂಡ ಐನ್ ಒಚ್ಚೆರೆಲಾ ಗಲಸುವ.ಐನ್ ಉಪಯೋಗಿಸಾವುನೆರ್ದ್ ಲಾ  ಪೊಕಾಡೆ ಅಲ್ ಅಲಕ್ಕ ಮಲ್ಪುನವೇ ಜಾಸ್ತಿ. ಇನಿಕೋಡೆಡ್  ಅವು ನಂಕೊಂಜಿ ಅಭ್ಯಾಸನೆ ಆದ್ ಪೋತುಂಡು. ಇಂಚಿ ಪೇಪರ್ ಮಲ್ಪುನಿ ಕಡ್ತಿನ ಮರರ್ದೇ ಆಯಿನೆರ್ದಾವರ,ನಮ ಏತ್ ಜಾಸ್ತಿ ಐನ್ ಗಲಸುವನಾ ಆತ್ ಜಾಸ್ತಿ ಮರ ಕಡ್ಪೊಡಾಪುಂಡು ಪನ್ಪಿನ ನೆಂಪು ದೀವೊಡೇ ಅಯಿನ ಇಚಾರ.

ಒಂಜಿ ಲೆಕ್ಕಾಚಾರ ಪ್ರಕಾರ ದಿನೊಕು 27,000 ದಾತ್ ಮರ ಕಡ್ಪೊಡಾಪುಂಡು ಪನ್ಪಿನ ಸೋದ್ಯ ಆಂಡಲಾ ಸತ್ಯ ಸಂಗತಿ ತೆರಿದುಪ್ಪಡ್.ಇಂಚ ವರ್ಸೊಗು 98,55,000. ಸುಮಾರ್ ಅಂಚಿಂಚಿ 365 ದಿನೊಕು ಒಂಜಿ ಕೋಟಿದಾತ್ ಮರತ ಮಾರಣಹೋಮ ನಮ ಮಲ್ಪುವ ಪಂಡ ಆಚಿರ ಆಪುಜೇ?ಇಂಚೆನೇ ಮರ ಕಡ್ತ್ ಕಡ್ತ್ ಖಾಲಿ ಆಂಡ  ನನ ನೂದು ವರ್ಸಲಾ ನಮ ನಮ್ಮ ಈ ಭೂಮಿದ ಮಿತ್ತ್ ಬದುಕುಲೆಕನೇ ಇಜ್ಜಿ.ಮರನೇ ಇಜ್ಜಿಂಡ ಬದುಕುನೆಂಚ ಪನಿ? ಅಂಚಾದ್ ನಮ ಮಾತೆರ್ ಲಾ ಒಂಜಿ ಒಮ್ಮತದ ತೀರ್ಮಾನ ದೆತೊನೆಡೇ ಆಯಿನ ಕಾಲ ಉಂದು.ನಮ ಮಾತೆರ್ ಇನಿರ್ದೇ ನಮ್ಮ ದಿನನಿಚ್ಚದ ಬದ್ಕ್ ಡ್ ಕೆಲ ಬದಲಾವಣೆ ಮಲ್ತಡ ಮಾತ್ರ ಉಂದು ಸಾಧ್ಯ.ಯಾನ್ ಒರಿ/ಒರ್ತಿ ತೀರ್ಮಾನ ದೆತೊಂದು ದಾದ ಆವೊಡು ಪಂದ್ ಗೆರೆಪಂದೆ... ಏರೆಗ್ ಮಾತಾ ಟುವೆಲ್ ಪತೊನ್ನ ಆಭ್ಯಾಸ ಇಜ್ಜಾ ಅಕುಲ್ ಮಾತ ಸುರೂಕಾದ್ ಒಂಜಿ ಕರ್ಚೀಪ್, (ಹ್ಯಾನ್ ಕೀ )ಪತೊನೆರೆ ಕಲ್ಪುಗ. ಇನಿರ್ದೇ ಕಿಸೆಟ್ ದೀವೆರ್ ಅಭ್ಯಾಸ ಮಲ್ಪುಲೆ.ರಡ್ಡ್ ಮೂಜಿ ಮೊಬೈಲ್ ಕಿಸೆಟ್ ಕುಲ್ಲುನಗ ಒಂಜಿ ಎಲ್ಯ ಕರ್ಚೀಫು ಕುಲ್ಲೆರೆ ಜಾಗೆ ಉಪ್ಪಂದಾ?.ರಡ್ಡನೇದಾದ್ ನಿಕುಲು ಹೆಚ್ಚಾದ್  ಓಲು "ಟಿಶ್ಯೂ" ಕಾಕಜಿ ಜಾಸ್ತಿ ಗಲಸುವರಾ ಔಲು ಒಂಜಿ ಎಲ್ಯ ಬೈರಸ್ ಅತ್ತ್ಡ ಹ್ಯಾಂಡ್ ಕರ್ಚೀಫ್ ದೀಲೆ.ಓಲುಪಂಡಾ,ಕಾರ್ ಆಫೀಸ್, ವಾಶ್ ಬೇಸಿನ್ದಲ್ಪ ಬೊಕ್ಕ ಬ್ಯಾಗ್ ಡ್ ಪೂರಾ. ಅವೆನ್ ಮಾತ್ರ ಕಪ್ಪಡೆ ಕಟ್ಟಾದ್ ದೀವಂದೆ ವಾರಗೊರ ಅರ್ದ್ ಲೆ ಅತ್ತ್ ಡ ಅರ್ದಾಲೆ. ನನ ಓಲು ಬೇತೆದಾಲಾ ಸಾಧಿಯೇ ಇಜ್ಜಾ ಅಂಚಿನ ಅಗತ್ಯದ ಜಾಗೆಡ್ ಮಾತ್ರ ಈ ಟಿಶ್ಯೂನು ಗಲಸ್ಲೆ. ಅವ್ಲಾ ನಾಲ್ ದೆತೊನ್ನವ್ಲು ರಡ್ಡೆಟ್ಟೇ ಸುಧಾರ್ಪೆರೆ ಕಲ್ಪಿ.

ಅತ್ತ್ ಒಂಜಿ ಆಲೋಚನೆ ಮಲ್ಪಡಾಯಿ ಸಂಗತಿ ಪಂಡ ನಮ ಪ್ರತಿಯೊಂಜೆನ್ಲಾ ಈ ಪಡ್ಡಯಿದಕ್ಲೆ ( ಪಾಶ್ಚಿಮಾತ್ಯ)ಅಭ್ಯಾಸ ಮಲ್ತಿನವೇ ಈ ಮಾತಾ ಮಲಾಮತ್ತ್ ಗ್ ಕಾರಣ.  ಸುರೂಟು ನಮ ಕೈ ನ್ ಕಾಕಜಿಡ್ ಒಚ್ಚುನ ಬದಲ್ಗ್ ದೆಕ್ಕೆರೆ ಕುಡ ಸುರುಮಲ್ಪೊಡಾತ್ತಂಡ್. ಪರದೇಶದಕ್ಲು ನಮ್ಮ ಯೋಗ, ನಮ್ಮ ಪಂಡಿತೆರೆ ಆಯುರ್ವೇದ ಗಿಡಮೂಲಿಕೆದ ಮರ್ದ್, ನಮ್ಮ ಊರ್ದ ಪೆತ್ತದ ಅಂಬಿರ್ದ್ ಪತ್ತ್ದ್ ನೈಯಿ ಮುಟ್ಟ ಪೊಸ ಪೊಸ ಸಂಶೋದನೆ ಮಲ್ತ್ ಅಕ್ಲೆ ಊರ್ದ "ಪೇಟೆಂಟ್" ಮಲ್ತೆರ್. ನಮ ಕುಲೋಂದು ತೂಯಿನೇ!. ಅತ್ತಾಂದೆ ಅಕ್ಲೆ ಪೊಟ್ಟು ನಾಲ್ ಟಸ್ಕ್ ಪುಸ್ಕ್ ಇಂಗ್ಲಿಷ್ ಪಾತೆರೊಂದು ಕಾಂಡೆ ತೋಡು ಗುಡ್ಡೆಡ್ ಕುತ್ತ ಕುಲೋಂದು ಮಲ್ಪೊಡಾಯಿನ ಬೇಲೆನ್, ನಾಲ್ ಗೋಡೆದ ನಡುಟು  ಅರ್ಧ ಕುಲೊಂದಾ ಅತ್ತ್ ಬೊಕ್ಕಲಾ ಗಂಟ್ ಬಗ್ಗುಜಿ ಪಂದ್ ಉಂತೋಂದೆ ಮಲ್ಪುನಡೆಮುಟ್ಟ ಎತ್ಯ! ಆತೆನಾ ಕುಡ ನೀರ್ಡ್ ಪೊರ್ಲು ದೆಕ್ಕೊಡಾಯಿ ಜಾಗೆನ್ ಕಾಕಜಿಡ್ ಒಚ್ಚೆರೆ ಕಲ್ತ( ಕೆಲವೆರ್). ಉಂದು ವಾ ನಮುನೆದ ದರಿದ್ರ ಪನಿ!?. ಇಂಚಿಪ್ಪ ಒಂಜಿ ಐನ್ ಪತ್ತ್ ಒರ್ಸೊಡು ನಮ ಈ ಪೇಪರ್ಡೇ ಪೂರಲಾ ಒಚ್ಚೆರೆ ಕಲ್ತಿನ ಅತೆ? ಇಜಿಂಡ ನಮ ನೀರ್ಡೇ ಕೈ ಬೊಕ್ಕ ಬೇತೆನ್ ಪೂರಾ ದೆಕ್ಕೊಂತಿನಿ ಅತೆ?. ಇತ್ತೆ ನಿಕುಲು ಎನ್ನೆರೆ ಯಾವು ಅಪಗಾಂಡ ನೀರ್ದ ಖರ್ಚಿ ಜಾಸ್ತಿ ಆಪುಜಾ ಪಂದ್. ಆಂಡ ,ಒಂಜಿ ನೆನಪು ದೀಲೆ ಕಾಲಿ ಒಂಜಿ ("ಟೋಯ್ಲೆಟ್ ರೋಲ್" )ಆ ತಂಡಸ್ದ ತೆಲ್ಪುದ ಕಾಕಜಿ ತಯಾರ್ ಮಲ್ಪೆರೆ 37ಗ್ಯಾಲನ್ ನೀರ್ ಬೊಕ್ಕ ಮರತಪೊಡಿ ಉಪಯೋಗ ಆಪುಂಡುಗೆ!. ಅಪಗಾಂಡ ಒವ್ ಎಡ್ಡೆ? ನೀರೆ ಅತ್ತ್ ಕಾಕಜಿಯೆ? ನಿಕುಲೆ ನಿಗಂಟ್ ಮಲ್ಪಿ...

ಅಂಚಾದ್ ಉಂದೆನ್ ಓದೊಂದುಪ್ಪುನ ಮಾತೆರ್

ಇತ್ತೆನೇ ಈ ಬಗೆಟ್ ಒಂಜಿ ಖಡಾಕಡಿತ ಗಟ್ಟಿ ತೀರ್ಮಾನ ದೆತೊನಿ.

ನಮಕ್ ಈ ದೇವೆರ್ ಕೊರಿ ಜಗತ್ತ್ ದ ಮಾತಾ ಸವಲತ್ತ್ ಲೆನ್ ಗಲಸೆರೆ ಮಾತ್ರ ಅಧಿಕಾರ ಉಪ್ಪುನತ್ತಾಂದೆ ಹಾಲ್ ಅಲಕ್ಕ ಮಲ್ಪೆರೆ ಅತ್ತ್ ಅತೆ?. ನಮ ಮಾತಾ ಆ ದೇವೆರೆ ಪೊರ್ಲುದ ಈ  ಸ್ರಷ್ಟಿದ ಭೂಮಿ ಪನ್ಪಿ ಇಲ್ಲಡ್ ಬಾಡಿಗೆಗ್ ಬತ್ ಕುಲ್ದಿನಕುಲು. ನಮ್ಮ ಬಾಡಿಗೆ ಚೀಟ್ ಮುಗಿದಾಯಿನೇ ಒಂಜಿ ದಿನ ಪೋಪಿನಕುಲು. ಅಂಚಾದ್ ಎಂಚ ಬಾಡಿಗೆದ ಇಲ್ಲ್ ಬುಡ್ನಗ ದನಿ ಬತ್ತ್ದ್ ತೂದು ಹಾಳಾತಿನ ಸೊತ್ತುಲೆನ, ಬಾಲೆ ಗೀಚ್ದ್ ಲಗಾಡಿ ಮಲ್ದಿನ ಗೋಡೆದ ಪೈಂಟ್ ದ ಖರ್ಚಿದ ದುಡ್ಡು ನು ನಮ್ಮ ಡೆಪೋಸಿಟ್ ಡ್ ಕಡ್ತ್ ದ್ ಕೊರ್ಪೆನಾ ಅಂಚೆನೇ ಈ ಭೂಮಿದ ಯಜಮಾನ್ಯೆ ಆ ತೋಜಾಂದಿ ದೇವೆರ್ ನಮ ಸೈತ್ ಮಿತ್ತ್ ಪೋಯಿಬೊಕ್ಕ ಖಂಡಿತಾ ಐತ ಬಡ್ಡಿ ಅಸಲ್ ನಮಡ ವಸೂಲಿ ಮಲ್ಪಂದೆ ಕುಲ್ಲಯೆರ್. ಅಂಚಾದ್ ಮೂಲು ಉಪ್ಪುನ ಮುಟ್ಟ ಮೂಲಿತ್ತಿ ನಮಕ್ ಕುಡ ಮಲ್ಪೆರಾವಂದಿ ಸೊತ್ತುಲೆನ್ ಪೊರ್ಲುಡು ಏತ್ ಬೋಡಾ ಆತೇ ಗಲಸ್ದ್ ನನ ದುಂಬುಗು ಬಾಳ್ದ್ ಬದ್ಕೆರೆ  ಉಪ್ಪುನ ನಮ್ಮನೇ ಸಂತತಿ ಗ್ ಬುರ್ದು ಪೋವೊಡಾಯಿನ ಅನಪತ್ಯ ಉಂಡು.   ನಿಕುಲು ಉಂದೆನ್ ಒತೊನುವರ್ ಪಂದ್  ಯಾನ್ ಗೆರೆಪುವೆ. ಅಂಚಾದ್ ಉಂದು ಅಗತ್ಯವಾದ್ ಆವೊಡಾಯಿನವೇ...ಮಲ್ಪುವರತ್ತೇ?.

- ಶರತ್ ಶೆಟ್ಟಿ ಪಡುಪಳ್ಳಿ

ತುಲುವೆರೆ ಕಲ ಕುಡ್ಲ