ಒರಿಯೆ ಮಹಾ ಪಂಡಿತೆರ್ ಇತ್ತೆರ್ ಗೆ ಒರ ಸುದೆ ಕಡಪ್ಪುನಗ ಓಡೊಟು ಪೋವೊಡಾತ್ ಬತ್ತ್ಂಡ್ ಗೆ. ಅಂಚ ಓಡ ಒಚ್ಚುನಾಯೆನೊಟ್ಟುಗ್ ತನ್ನ ಬಿರ್ಸಾದಿಗೆ ಪಾಂಡಿತ್ಯ ಪ್ರದರ್ಶನ ಮಲ್ತೋಂದಿತ್ತೆಗೆ ಆತಾನಾಗ ಮೌನೊಡು ಕೆಬಿ ಕೊರೊಂದಿತ್ತಿನ ಓಡ ಒಚ್ಚುನಾಯೆ ಪಂಡೆಗೆ. ಈರೆಗ್ ಮೀಜೆರ ಬರ್ಪುಂಡಾ ಬಿರುಗಾಳಿ ಬತ್ತೊಂದುಂಡು, ಓಡ ಮಗುರು ಪಂಡ್ ತ್ ಪನ್ನಗ ಪಂಡಿತೆ ಕಂಗಾಲಾಯೆಗೆ.
ಅಂಚನೇ ಬೊಕ್ಕೊರ ಒರಿ ಮಲ್ಲ ಲೆಕ್ಕದ ಪಂಡಿತೆ ಒಂಜಿ ಸಂಕ ಕಡಪ್ಪೊಡಾಂಡ್ ಗೆ. ಜೋರು ಬೊಲ್ಲ ಬತ್ತದಿತ್ತ್ಂಡ್ಗೆ. ಆಯೆ ಗಂಟೆ ನಿಮಿಷ ಲೆಕ್ಕ ಪಾಡ್ತ್ ಪತ್ತ್ ನಿಮಿಷೊಡು ಒಂಜಿ ಇಂಚ್ ಮಿತ್ತ್ ಬೈದ್ಂಡ್ ನೀರ್.ಅಂಚಾದ್ ಪೂರಾ ಮುರ್ಕೆರ ಒಂಜಿ ಗಂಟೆ ಬೋಡಾವು ಪಂಡೆಗೆ.ಆಂಡ ಅವು ಓಲು ಕೇನುಂಡು ಐನೇ ನಿಮಿಷೊಡ್ ಸಂಕ ಮುರ್ಕುಂಡುಗೆ.
ಇಂಚ ಏತೆ ಕಲ್ಪಾಟಿಕೆ ಉಂಡಾಂಡಲಾ ಸಾಮಾನ್ಯ ಗೇನ ಬೇತೆನೇ.
ತಾನ್ ಕಾಸ್ ಉಂಡು ಪಂಡ್ದ್ ಜೋಕ್ಲಾಟಿಕೆ ಮಾಲ್ತ್ಂಡ ಎಂಚಾವು ಬೋಡಾಯಿನಾತ್ ಜವಾಬ್ದಾರಿ ತೆರಿನಾಯೆ ಒಂಜಿ ಕಾಲೇಜ್ ಡ್ ಪ್ರಾಚಾರ್ಯೆ ಆತಿತ್ತ್ಂಡ ಆಯೆ ಜೋಕ್ಲೆಗ್ ಬುದ್ಧಿ ಪನೊಡಾಪಿನವುಲ್ ಬೇಕಾ ಬಿಟ್ಟಿ ಬೊಡ್ಚಾಂದಿ ಕಾರ್ಯೊಗು ಸಲಿಗೆ ಕೊರುಂಡ ಎಂಚಾವು?
ದಾಲಾ ಬರವು ತೆರಿಯಂದಿನಾಯೆ ಗುರ್ತು ಪರಿಚಯೊಡ್ತಾತೋ ಕಾಸ್ ಕೊರ್ತೋ ಮಲ್ಲ ಪುದರ್ ದ ಮಲ್ಲಾದಿಗೆ ಸಮ್ಮಾನ ಗೆತೊಂಡ ಅವು , ಆ ನರಮಾನಿಯನ್ ಪೊಕ್ಕಡೇ ಗೊತ್ತಿಜ್ಜಾಂದೆ ಉಪ್ಪುನಾಯರ ಆಂಡಲಾ ಬಾಕಿ ನರಮಾನಿಲು ಆಯೆ ಮಸ್ತ್ ತೆರಿನಾರ್ ಪನ್ಪಿ ನಂಬೊಳಿಗೆ ದೀ ಲೆಕ್ಕ ಆಪುಂಡು. ಅಂಚಿತ್ತಿನಾಕ್ಲು ಕೂಡಾ ಮಾನಾದಿಗೇಡ್ತ್ ಮಸ್ತ್ ದುಂಬು ಮಾನಾದಿಗೆ ಪತ್ರ ಕೂಡಾ ಪಡೆಯೋಂದು ಜಾಲತಾಣೊಡು ಪಾಡ್ದ್ "ಪನ್ಪಿನ ಶಾಸ್ತ್ರ ಪಾಡುನೆ ಗಾಲ " ಪನ್ಪಿ ಲೆಕ್ಕ ಆಪುಂಡತ್ತೇ!
ಕೆಲವು ನರಮಾನಿಯಗ್ ತಾನ್ ಮಸ್ತ್ ತೆರಿನಾಯೆ ತನ್ನವು ತಪ್ಪೇ ಇಜ್ಜಿ ಪನ್ಪಿ ಗರ್ವೊಡು ಬೊಕೊರಿ ತೆರಿನಾಯೆ ತಪ್ಪು ತೋಜಾಂಡ ಪಿಸಿರು ಬರ್ಪುನೆಲಾ ಉಂಡು. ಮಸ್ತ್ ತೆರಿನಾಯೆ ತಪ್ಪು ಬರೆದ್ ಅಯಿನೇ ಸಾಧಿಸೋಂದು ಪೋಪಿನಲಾ ಉಂಡು.
ಭಾರೀ ಗೊತ್ತುಂಡು ಪಂಡ್ತ್ ಬೀಗುನಾಯೆಲಾ ಸೋತು ಪೋಪುನ ಏತೋ ಸಂದರ್ಭೊ ಬರು ಪನ್ಪುನ ತಿಳುವಳಿಕೆ ಭಾರೀ ಮುಖ್ಯ ಪಂಡ್ ತ್ ಈ ಗಾದೆ ಪಾತೆರ ಪನ್ಪುಂಡು
ಡಾ ಸುರೇಶ ನೆಗಳಗುಳಿ
ತುಲುವೆರೆ ಕಲ ಕುಡ್ಲ