ನಮ್ಮ ತುಲುನಾಡ್ ಪ್ರಾಕೃತಿಕವಾದ್ ಯೇತ್ ಪೊರ್ಲುಂಡಾ ಆತೆ ಪೊರ್ಲು ನಮ್ಮ ಆಚಾರ, ವಿಚಾರ, ಸಂಸ್ಕೃತಿ, ಸಂಸ್ಕಾರ, ಆಚರಣೆಲು. ಬೌಗೋಲಿಕವಾದ್, ಸಾಂಸ್ಕೃತಿಕವಾದ್, ಸಾಮಾಜಿಕವಾದ್, ಆರ್ಥಿಕವಾದ್, ಧಾರ್ಮಿಕವಾದ್ ತೂಂಡಲಾ ನೆಗತ್ತ್ ತೋಜುನ ಮನ್ನ್ ನಮ್ಮ . ತುಲುವೆರ್ ಪಸಂದ್ರನ್ ದೇವೆರ್ ಪಂದ್ ಪೂಜೆ ಮಲ್ಪುನಕುಲು. ಪ್ರತಿ ದೈ ಮರ, ಕಲ್ಲ್, ಗುಡ್ಡೆ, ಪಿರಣಿ ಪಕ್ಕಿಲೆಡ್ ದೇವೆರೆನ್ ತೂಪಿನಕುಲು ಅಂಚಾದ್ ನಮಕ್ ಪ್ರಕೃತಿ ಆರಾಧನೆನೇ ಪ್ರಧಾನ. ಬಹುಶಃ ನಮ್ಮ ಮೆಯ್ಟ್ ಪರಪುನ ನೆತ್ತೆರ್ಡ್ ಅವ್ವೆ ಬಾಮೊ ಬೆಸ್ಗೆಯಾದ್ ಪೋದುಪ್ಪು ಅಂಚಾದೇ ತೋಜೊಡು ನಮ್ಮಕಲೆಗ್ ಕಟ್ಟದ ಕೋರಿಡ್ ತೋಜುನ ಪೊರ್ಲು ವಾ ಪಿಚ್ಚರ್ದ ಈರೋಯಿನ್ಡಲಾ ತೋಜುಜಿ, ಕಂಬ್ಲದ ಎರ್ಲೆನ ಮಿತ್ತ್ ಉಪ್ಪುನಂಚಿನ ಅಭಿಮಾನ ಒವ್ವೆ ಪಿಚ್ಚರ್ದ ಈರೊನ ಮಿತ್ತ್ ಬರ್ಪುಜಿ.ಇಂಚಪ್ಪ ತೀರಿನ ರಾಕೆಟ್ ಮೋಡೆ, ನಾಗು, ಲಕ್ಕಿ ,ಗಂಗೆ ಎರ್ಲೆಗ್ ಯೇತ್ ಜನ ಅಭಿಮಾನಿಲು ಬೇಜಾರ್ ಪಟ್ಟ್ದಿತ್ತೆರ್. ಅಂಚ ಒಂಜಿ ವಿಶೇಷವಾಯಿನ ಬಾಮೊ ನಮ್ಮ ಬೊಕ್ಕ ಪ್ರಕೃತಿದ.
ತುಲುನಾಡ್ಡ್ ಭೂತಾರಾಧನೆ ಬೊಕ್ಕ ನಾಗಾರಾಧನೆಗ್ ಯೇತ್ ಮಾನಾದಿಗೆ ಕೊರ್ಪೆರಾ ಆತೆ ಮಾನಾದಿಗೆ ಕಂಬ್ಲಗ್ಲಾ ಕೊರ್ಪೆರ್. ಮುಲ್ಕಿ, ಕಟಪಾಡಿ, ಐಕಳ ಇಂಚ ಕೆಲವು ಕಡೇಟ್ ಸಾಂಪ್ರದಾಯಿಕ ಕಂಬ್ಲ ಆಪುಂಡು ಮುಲ್ಪ ಕೋಲ, ಕಂಬ್ಲದ ಆಟಲಾ ನಡಪುಂಡು. ಪಣಪಿಲ, ಪಿಲಿಕುಲ, ಕೊಡಂಗೆ, ಕಕ್ಕೆಪದವು, ಮುಲ್ಪದ ಕಂಬ್ಲ ಮುಗಿದ್ಂಡ್ ನನ ಮುಲ್ಕಿ, ಕುಡ್ಲ, ಹೊಕ್ಕಾಡಿಗೋಳಿ, ಬಾರಾಡಿ ಬಳ್ಳಮಂಜ, ನರಿಂಗಾನ,ಅಡ್ವೆ, ಬೆದ್ರ, ಐಕಳ, ಜಪ್ಪು, ತಿರುವೈಲು ಗುತ್ತು, ಕಟಪಾಡಿ, ಪುತ್ತೂರು, ಬಂಟ್ವಾಳ, ಬಾರಾಡಿ, ಉಪ್ಪಿನಂಗಡಿ, ವೇಣೂರು, ಬಳ್ಕುಂಜೆ, ಗುರುಪುರ ಅಂಚೆನೇ ಶಿವಮೊಗ್ಗಡ್ಲಾ ನನ ಸಾಲಾದ್ ಕಂಬ್ಲ ನಡಪರೆ ಉಂಡು. ಕಂಬ್ಲದ ಎರ್ಲು ಪಂಡ ನಮಕ್ ಬಾರಿ ಆಕರ್ಷಣೆ. ಅವ್ ತುಲುನಾಡ್ದ ಪೆರ್ಮೆಲಾ ಅಂದ್ ಅಂಚಾದೇ ಪಯ್ಯೊಟ್ಟು ಸದಾಶಿವ ಸಾಲಿಯಾನೆರೆನ ನಾಗರಾಜೆ ಭಾರತ ಅಂಚೆ ಇಲಾಖೆದ ಸ್ಟಾಂಪ್ಡ್ ಗತ್ತ್ಡ್ ಮೆನ್ಕ್ದಿನಿ. ಕರಿನ ಸರ್ತಿ ಕುಡ್ಲದ ಒಂಜಿ ಕಾಲೇಜ್ಗ್ ಕಾರ್ಯಕ್ರಮದ ಬಾಗವಾದ್ ಬೈದಿನ ಕಂಬ್ಲದ ಎರ್ಲು ಅಲ್ಪ ಮಲ್ಲ ಸೆಲೆಬ್ರಿಟಿಲೆಕ ರೈಸ್ಂಡ್. ಐತ ಒಟ್ಟುಗು ಫೋಟೋ ದೆಪ್ಪರೆ ಜೋಕುಲು ರಾಶಿ ಬೂರ್ದಿತ್ತೆರ್. ಅಂಚ ಯಾನ್ಲಾ ಕಂಬ್ಲದ ಎರ್ಲೆನ ಬಗೆಟ್ ಒಂಜಾತ್ ಮಾಹಿತಿ ದೆತೊನುನ ಪ್ರಯತ್ನ ಮಲ್ತೆ.
ಕಂಬ್ಲದ ಬಗೆಟ್ ವಿಶೇಸ ಆಸಕ್ತಿ ಅಭಿಮಾನ ಇತ್ತಿನಕಲೆಗ್ ಐತ ಉಲಯ್ ಪಿದಯ್ ಮಾತಾ ಗೊತ್ತಿಪ್ಪು ಆಂಡ ಎನ್ನಂಚಿನ ಸಾಮಾನ್ಯೆರೆಗ್ ಅತ್ತ್ಂಡ ಪ್ರಾಣಿಹಿಂಸೆ ಪ್ರಾಣಿಹಿಂಸೆ ಪಂದ್ ಪೊಕ್ಕಡೆ ಕಾರೊಯ್ಪರೆ ತೂಪಿನಕಲೆಗ್ ಒಂಜಾತ್ ಮಾಹಿತಿ ತೆರಿಯೊನುನ ಅಗತ್ಯ ಉಂಡು. ನಮ್ಮ ಸಂಸ್ಕೃತಿ ಒರಿಯೊಡಾಂಡ ಉಂದು ಅನಿವಾರ್ಯ.
ಆನಿ ಅಲ್ಪ ಗತ್ತ್ಡ್ ಮೆರೆಯಿನಿ ಇರುವೈಲು ದೊಡ್ಡಗುತ್ತು ಜಗದೀಶ್ ಶೆಟ್ರೆನ ಕಂಬ್ಲದ ಎರ್ಲು. ಅರೆಡ ಅಡ್ಡ ಪಲಯಿ, ಬಲ್ಲ್ದ ಮಲ್ಲ ಬೊಕ್ಕ ನಾಯೆರ್ದ ಮಲ್ಲ ಪಲಯಿ ಪಂತೊಡು ಪಾಲ್ ಪಡೆಪಿನ ಮಂಜು, ಅಚ್ಚಡ ಬೊಲ್ಲೆ, ಪವನ್, ಚಿನ್ನು, ಪಾಂತೆ, ಮೋಡೆ ಪನ್ಪಿನ ಒಟ್ಟು ಆಜಿ ಕಂಬ್ಲದ ಎರ್ಲುಲ್ಲ. ಪ್ರತಿ ಕಂಬ್ಲಡ್ ಮೊಕುಲು ಪಾಲ್ ಪಡೆಪೆರ್. ಉಂದೆತ ಉಸ್ತುವಾರಿನ್ ತೂವೊನರೆ ಪದ್ರಾಡ್ ಜನತ ಟೀಮ್ ಉಂಡು. ಕಂಬ್ಲದ ಎರ್ಲೆನ್ ತಾಂಕುನ ಬಗೆಟ್ ಪೊರ್ಲುದ ಮಾಹಿತಿನ್ ಅಲ್ಪ ಎಂಕ್ ಪ್ರಮೋದ್ ಕೊರಿಯೆರ್, ಅವೆನ್ ಮೂಲು ಪಟ್ಟುವೆ. ಕಂಬ್ಲದಾನಿ ಸುರುಕು ಕುಡು ಬೈ ಪೂರ ಪಾಡ್ದ್ ಬೊಕ್ಕ ಎರ್ಲೆನ್ ಪೊರ್ಲು ಮಲ್ತುದು ದೆಕ್ಕುವೆರ್ ಆದ್ ಬೊಕ್ಕ ಮೆಯ್ಕ್ ಎಣ್ಣೆ ಪೂಜಿದ್ ಕೊಂಬುಗು ಸುಣ್ಣದ ಗೀಟ್ ಒಯ್ತ್ದ್ ಐತ ಮಲ್ಪುವೆರ್. ನುಗ, ಮರ, ನೆತ್ತಿ ಬಲ್ಲ್, ಕೋಂಟು ಬಲ್ಲ್, ಪೊನಕೆ, ತಪ್ಪು (ದೃಷ್ಟಿ ಆವಂದಿಲೆಕ ದೀಪಿನ ನಾಲೈನ್ ಬಗೆತ ತಪ್ಪುದ ಕಟ್ಟ್) ಉಂದೆನ್ ಪೂರ ಕನತ್ ತುಳಸಿ ಕಟ್ಟೆದಲ್ಪ ದೀದ್ ಧನಿ ಪೂಜೆ ಮಲ್ತುದು ಕಂಬ್ಲಗ್ ಎರ್ಲೆನ್ ಕಡಪುರ್ದು ಕೊರ್ಪೆರ್. ಕಂಬುಲದ ಕೂಟಗ್ ಬತ್ತಿ ಬೊಕ್ಕ ಪೂರ ಜವಾಬ್ದಾರಿ ಜವನೆರೆನ. ಪೊರ್ತು ಪೊರ್ತುಗು ನೀರ್ ದೀಪಿನಿ, ದೊಂಬುದ ಬಚ್ಚೆಲ್ ಅರಪರೆ ಬಚ್ಚಂಗಾಯಿ ತಿನ್ಪಾವುನು, ಜೂವಗ್ ಸೆಕೆ ದರ್ಪಂದಿಲೆಕ ಚಂಡಿ ಕುಂಟು ಮಲ್ತುದು ಮೆಯ್ತ ಮಿತ್ತ್ ಪಾಡುನು, ಕಾರ್ಗ್ ಮಸಾಜ್ ಕೊರ್ಪಿನಿ ಇಂಚ ಪೂರ ಬೇಲೆ ಜವನೆರ್ ಮಲ್ಪುವೆರ್. ವರ್ಸಗ್ ಪದ್ನಾಜಿ ಕಂಬ್ಲ ಉಪ್ಪುಂಡು. ಕಂಬ್ಲ ಮಾತಾ ಕರಿನೇ ಇಲ್ಲಡೇ ಪೊರ್ಲುಡು ತಾಂಕುವೆರ್. ಈ ಎರ್ಲೆನ್ ತಾಂಕರೆ ಪಂದೇ ಮಲ್ಲ ಸಂಬಲ ಕೊರ್ದು ಬೇಲೆಗ್ ಜನ ದೀಪೆರ್, ಅಕುಲು ಕಾಂಡೆ ಎರ್ಲೆನ್ ಪಿದಯ್ ಕಟ್ಟುನಾ, ಉಡಲ್ ಸಂಪು ದೀವರೆ ಕ್ಯಾರೆಟ್, ಕುಂಬುಡ ಕೊರ್ಪಿನಾ, ನೀರ್ ದೀಪಿನಾ , ಕಾಂಡೆ ರಡ್ಡ್ ಸೇರ್ ಬೊಕ್ಕ ಬಯ್ಯಗ್ ರಡ್ಡ್ ಸೇರ್ದ ಕುಡು ಬೆಯ್ಪಾದ್ ಪಾಡುನಾ, ಕಾಂಡೆ, ಬಯ್ಯಗ್ ಎರ್ಲೆನ್ ದೆಕ್ಕುನಾ , ಸರ್ರೊಗು ವ್ಯಾಯಾಮ ತಿಕ್ಕರೆಗಾದ್ ದಿನೊಕು ರಡ್ಡ್ ಸಲ ನಡಪಾವುನ ಬೇಲೆ ಮಲ್ಪುವೆರ್.
ಕಂಬುಲ ಕೈತಲ್ ಆನಗ ಬೆನ್ನಿದ ಬೇಲೆಲಾ ಸುರು ಆಪುಂಡು ಆ ಪೊರ್ತು ಜೂವೊಗು ಕಸರತ್ತ್ ಕೊರ್ಪಿನ ನಿಲೆಟ್ ಒರ ಕಂಡನ್ ಇರ್ಲ ಮಲ್ಪರೆಗಾದ್ ಇಲ್ಲಡುಪ್ಪುನ ದಪ್ಪುನ ಎರುತೊಟ್ಟುಗು ಜೋಡಿ ಮಲ್ತುದು ಸುಮಾರ್ ಒಂಜರೆ ಗಂಟೆ ದಪ್ಪುವೆರ್. ದಿನೊಲ ಅರ್ದರ್ದ ಕಂಡ ದತ್ತ್ದ್ ಬೊಕ್ಕ ಪೂರ ಒರ ಇರ್ಲ ಮಲ್ತುದು ಬುಡ್ಪೆರ್ ಇಂಚ ಮಾಹಿತಿ ಕೊರೊಂದು ಪೋಪೆರ್ ಪ್ರಮೋದ್. ಪೇಟಾದಕುಲು ಪನ್ಪಿನ ಪ್ರಾಣಿಹಿಂಸೆದ ಬಗೆಟ್ ಕೇಂಡ ಕಂಬುಲಡ್ ಎಚ್ಚರ ಪುಟ್ಟಾರೆ ಮಾತ್ರ ರಡ್ಡ್ ಪೆಟ್ಟ್ ಬುಡ್ಪ ಬಾಕಿದ ದಿನೊ ಬಾಲೆದಲೆಕ ತೂಪ ಪನ್ಪೆರ್. ಕಂಬುಲದ ಎರುಕುಲೆನ ಕಿದೆಟ್ ಫ್ಯಾನ್ ಬೊಕ್ಕ ಎ.ಸಿ.ದ ವ್ಯವಸ್ತೆಲಾ ಉಪ್ಪುಂಡು. ಕಂಬುಲದಪಗ ಎರುಕು ಬೈ ಮಾತ್ರ ಪಾಡುವೆರ್ ಬಾಕಿದ ಸಮಯಡ್ ತಿನರೆ ಪಜಿರ್ ಕೊರ್ಪೆರ್.ಕಂಬ್ಲದ ಎರುಕು ಅರ್ಕಂಜಿ ಕೊರ್ಪುಜೆರ್. ದುಂಬು ಕುಡು ಬೊಕ್ಕ ತೌಡು ಮೆತ್ತ್ದ್ ಎರ್ಲೆಗ್ ಪಾಡೊಂದ್ ಇತ್ತೆರ್, ಇತ್ತೆ ಕುಡು ಪೊಡಿ ಮಲ್ಪರೆ ಪಂದೇ ಮೆಷಿನ್ ಬೈದುಂಡು. ಕುಡು ಬೆಯ್ಪಾದ್ ಪಸೆ ಪೋರೆ ಜಾಲಿಡ್ ಪಾಡಿ ಬೊಕ್ಕ ನೀರ್ ಅರ್ತ್ದಾಯಿನೇ ಪೊಡಿ ಮಲ್ತುದು ಪಾಡುವೆರ್. ಎರ್ಲೆನ ಆರೋಗ್ಯಡ್ ದಾಲ ವ್ಯತ್ಯಯ ಆಂಡ ಪಶು ವೈದ್ಯೆರೆಡ ತಪಾಸಣೆ ಮಲ್ಪಾವೆರ್. ಅವ್ವೆ ಅತ್ತಂದೆ ಕಂಬ್ಲದಪಗ ಊರುದ ಪಂಡಿತೆರ್ ದಿನೊಲ ಬತ್ತ್ದ್ ತೂದು ಪೋಪೆರ್. ಎರುತ ಕೊಂಬು ಉದ್ದ ಇತ್ತ್ಂಡ ಬೆರಿಕ್ ತಾಗಂದಿಲೆಕ ತುಂಡು ಮಲ್ಪುವೆರ್ , ಪರ್ತೆ ಇತ್ತ್ಂಡ ತರೆತ್ ಬಡ್ಡ್ ಮಲ್ಪುವೆರ್ ಇಂಚ ಮಲ್ಪುನಗ ಜಾಗ್ರತೆ ಅಗತ್ಯ ದಾಯೆಗ್ ಪಂಡ ಜಾಸ್ತಿ ತರ್ತ್ ಪೋಂಡ ಕೊಂಬುಡು ನೆತ್ತೆರ್ ಬರ್ಪುಂಡು. ಕಂಬ್ಲದ ಎರ್ಲು ತೂವರೆ ಬಾರಿ ಪೊರ್ಲು ಐತ ಅಲಂಕಾರಗ್ ನೆತ್ತಿ ಬಲ್ಲ್, ಕೋಂಟು ಬಲ್ಲ್, ಪೊನಕೆ, ಪಿತ್ತಲೆದ ನುಗ, ನಾಡೆ, ಬಲ್ಲ್ ಗಲಸುವೆರ್.
ಬೆನ್ನಿ ಬದ್ಕ್ಡೇ ಪುಟುದು ಬಲತಿನ ಎಂಕ್ ಎರ್ಲೆನ ಸ್ವಾಭಾವ ಪರಿಚಿತ. ಅವ್ ಭಾವ ಜೀವಿಲು. ಮೋಕೆಡ್ ಮಂಡೆ ಆಡದ್ ಲೆಪ್ಪುನ, ಕೋಪೊಡು ಸುಯ್ಪುನ, ಉಗ್ರೊಡು ಕಣ್ಣ್ ಮಲೆಪಿನ, ಕೊಂಡಾಟಡ್ ಮಂಡೆ ತೇಪುನ, ಅಕ್ಕರೆಡ್ ಪರ್ತೆ ನಾಲಯ್ಡ್ ನಕ್ಕುನ, ಕುಸಲ್ ಕುಸಾಲ್ಗ್ ತಾಡುನ ಕೆಲವು ಸಲ ಉಂದು ಗಾತಿ ಆಪಿನಲಾ ಉಂಡು, ಬೇನೆ ಬೆಸರಾಂಡ ಬುಲಿಪುನ, ಮರ್ಲ್ ಗುದ್ದೊಲಿದೆಕ ಪೆರ್ಚಿ ಕಟೊಂದು ಬಲಿಪುನ ಉಂದು ಐಕ್ಲೆನ ಹಾವಭಾವದ ತೂಪರಿಕೆ ಆಂಡ ನಾನಾ ನಮೂನೆದ ಸೊರೊಟು ತನ್ನ ಬಾಮೊನು ತೋಜಪಾವುನ ಚಾತುಪು ಐಕ್ಲೆಡ ಉಂಡು. ಅವ್ ಅತ್ತಾಂದೆ ನಮ್ಮ ಕುಸಿ ಬೇನೆ ಕೋಪ ಪೂರ ಐಕ್ಲೆಗ್ಲಾ ಗೊತ್ತಾಪುಂಡು. ನಮ ಯೇತ್ ಮೋಕೆ ಕೊರ್ಪನಾ ಆತೆ ಮೋಕೆ ನಮಕ್ ಐಕ್ಲೆಡ್ದ್ ಪಿರ ತಿಕ್ಕುಂಡು.
ಇರುವೈಲು ದೊಡ್ಡಗುತ್ತುದ ಜಗದೀಶ್ ಶೆಟ್ರೆನ ಎರ್ಲು ಸುಮಾರ್ ಪದಕಲೆನ್ ಗೆಂದ್ದ್ಂಡ್. ಕಂಬುಲಡ್ ಪಾಲ್ ಪಡೆಪಿನ ಮಾತಾ ಎರ್ಲೆಗ್ ಪದಕ ತಿಕ್ಕುಂಡು ಪಂದ್ ಅತ್ತ್ ಅಂಡಲಾ ಐತ ಯಜಮಾನೆರ್ ಐಕಲ್ನ ಪಿರವುಡು ಕರ್ಚಿ ಮಲ್ಪರೆ ಏಪಲ ದುಂಬು ಪಿರ ತೂಪುಜೆರ್. ಕಂಬ್ಲದ ಎರುತ ದನಿ ಪಂಡನೇ ಮಲ್ಲ ಮಾನಾದಿಗೆ. ಕಂಬ್ಲದ ಎರ್ಲೆಗ್ ಮೂಜಿ ತಿಂಗೊಲುದ ಶ್ರಮ ಬಾಕಿ ದಿನಕ್ಲೆಡ್ ರಾಜ ಮರ್ಯಾದೆ ಆಂಡ ಪೇಟಾದಕುಲು ಉಂದೆನ್ ಪೂರ ಓಲು ತೂಪೆರ್. ಸಾದಿ ನಡುಟು ಪೆತ್ತ ಕೈ ಕಂಜಿಲೆನ್ ಕೆರ್ದ್ ದಕ್ನಗ, ಮೀನ್ ಕೋರಿ ಬುಡಿ ಮೊಸಲೆನ್ಲಾ ಬುಡಂದೆ ತಿನ್ಪಿನ ಜನಕ್ಲೆನ ತೂದುಲಾ ತೂವಂದಿಲೆಕ ಮನಿಪಂದೆ ಕುಲ್ಲುನ ಪೇಟ ಸಂಸ್ಥೆಗ್ ಕಂಬ್ಲದ ಮಿತ್ತ್ ಬಾರಿ ಕಣ್ಣ್, ಅವೆನ್ ನಿಷೇಧ ಮಲ್ಪೊಡು ಪಂದ್ ಕೋರ್ಟ್ ಕಟ್ಕಟೆ ಮಿತರ್ದೆರ್. ಕಾಲಿ ಒಂಜಿ ರಡ್ಡ್ ಪೆಟ್ಟ್ ಕೊರ್ಪಿನ ತೂದು ಪ್ರಾಣಿಹಿಂಸೆ ಪಂದ್ ಪನ್ಪಿನಕುಲು ಅವೆನ್ ತಾಂಕುನ ಪೊರ್ಲುನು ಸರಿಯಾದ್ ತೂಯೆರ್ಡ ಐಕ್ ದಾದ ಪನುವೆರಾ...? ಆಂಡ ಅಂಚಿನ ಪ್ರಯತ್ನ ಅಕುಲು ಮಲ್ಪುಜೆರ್, ಅಕಲ್ನ ಈಡ್ ಪ್ರಾಣಿಹಿಂಸೆ ತಡೆಪುನೆಡ್ದ್ ಜಾಸ್ತಿ ನಮ್ಮ ಸಂಸ್ಕೃತಿನ್ ಬರಿಕ್ ಒಂದಾವುನಂಚ ತೋಜುಂಡು ಐಕ್ ನಮ್ಮ ಕಂಬ್ಲ ಬಲಿಪಶು ಆತೆ. ಆಂಡ ನಮ ನಮ್ಮ ಸಂಸ್ಕೃತಿನ್ ಆಚರನೆಲೆನ್ ತೆರಿಯೊನೊಡು ಅವೆನ್ ಒರಿಪೊಡು. ದುಂಬು ಪೊಂಜೋವುಲೆಗ್ ಕಂಬುಲಗ್ ಪೋರೆ ಅವಕಾಶ ಇತ್ತುಜಿ ಆಂಡ ಇತ್ತೆ ಅಂಚಿನ ವಾ ಕಟ್ಟ್ ಪಾಡ್ಲಾ ಇಜ್ಜಿ. ಮಾತೆರ್ಲ ಕಂಬುಲಗ್ ಪೋಲೆ, ತುಲು ಮನ್ನ್ದ ಪೊರ್ಲುನು ತೂಲೆ.
✍️ ಗೀತಾ ಲಕ್ಷ್ಮೀಶ್
ತುಲುವೆರೆ ಕಲ