ಓಲುಂಡು ನಮ್ಮ ಪೊರ್ಲ ತುಳುನಾಡ್

ಓಡೇಗ್ ಪೋಂಡು ತಿರ್ಲ ತುಳು ಬಾಸೆ

ಮುಕ್ಕರಿಗೆಡ್ ಕಂತ್ ಕಟ್ಟ್ ದ್ ಕೆದುಕು

ನೀರಮರಾಯಿಡ್ ನೀರ್ ತೇತಿ ಕಂಡೊಲು.



ಎರ್ಲೆಗ್ ನುಗ ನಾಯೆರ್ ಕಂಡ ದತ್ತ್ ದ್

ಮಾತೆರೆನ್ ನೆನೆತೊಂದು ಪುಂಡಿತ್ತ್ ಪಾರಾದ್

ಕಂಡೊಗು ಕಾಯೆರ್ ಕಣೆ ಕಾಪು ದೀದ್

ಬಾರೆ ಕಂಡ ಪೂಕರೆ ಕೊಡಿ ಏರ್ನ


ಪೇರ್ ದೀದ್ ಜತ್ತ್ ಕಂಡ ಕೆಯ್ ಕೊಯ್ನ

ಬಾರ ರಾಸಿಗ್ ಜಾಲ್ಡ್ ಪೊಲಿ ಲೆತ್ತೀನ

ಪರ್ಬ ಮೀಪೀ ಮಂಡೆಗ್ ಐತ ಮಲ್ತಿ

ಪುಡ್ಯಾಡ್ ದ್ ಕರೊಕು ಪುದ್ವಾರ್ ಉನ್ಪಿ


ದೊಂಪದಡಿ ದೇಸೆದ ಮದಿಮೆ ಮಯಕಾಂಡ್

ಪುದ್ವರ್ ಗ್ ಬಾಲೆಗ್ ಪೇರ್ನುಪ್ಪು ಓಂಡು

ಮದಿಮೆ ಸಾವು ಪೂರ ದೇಲ್ಯೊಗೇ ಪೋಂಡು

ಉಲಯಿ ಲೆಪ್ಪೆರೆ ಬರುವ ಪಿಂಡ ಬುಡ್ ದಾಂಡ್


ಮಣ್ಣ ನಾಗ ಮುರಿಟ್ ಬನೊಟು ನೀರ್ದೀದ್

ಬೇಸದ ತನು ಮೈತಿ ಬನೊಕುಲು ಓಂಡು

ಬೆಮ್ಮೆರೆನ ಉರ್ಪೆಲರಿ ಸುತ್ತೆ ಮಯಕಾಂಡ್

ತುಳುನಾಡ ದೈವೊಲು ದೇವೆರಾದಾಂಡ್


ಸಂಕ್ರಾಂತಿ ಸಿಂಗೊಡೆ ಕಾಲಾದಿ ಮದತ

ಬಾರ ತುಪ್ಪೆ ಅರಿತ ಮುಡಿ ದಾದ ತೆರಿತ

ಕೊಡಿಯಡಿತ ಕುಂಟು ಮಡಿ ದಲ್ಯ ಮಯಕಾಂಡ್

ತುಳುವೆರೆನ ನಂಬೊಳಿಗೆ ಅಡಿ ಮೇಲ್ ಆಂಡ್.


ಕವಿ

-ಕೆ.ಮಹೇಂದ್ರ ನಾಥ್ ಸಾಲೆತ್ತೂರು.

-ಕಾವ್ಯಸುತ-