ಈ ಜಗತ್ತ್ ಒಂಜಿ ಅದ್ಭುತ ಸ್ರಿಸ್ಟಿ , ದೇವೆರೆ ಉಲ್ಲೆರಾ ಇಜ್ಜೆರಾ ಗೊತ್ತುಜ್ಜಿ ಆಂಡ ಒಂಜಿ ದಿವ್ಯ ಶಕ್ತಿ ಈ ಅದ್ಭುತಗ್ ಕಾರನ ಪನ್ಪಿನೆನ್ ನಂಬುನೆಟ್ಟ್ ದಾಲ ಅನುಪಿಜ್ಜಿ. ಏತೊಂಜಿ ಪೊರ್ಲು ಈ ಸ್ರಿಸ್ಟಿ ಕಣ್ಣ್‌ಗ್ ತೋಜಂದಿ ಒಂಜಿ ಸೂಕ್ಷ್ಮ ಅಣುಡ್ದ್ ಪತಿನ ಮುರ್ಗ, ಪಕ್ಕಿ, ನರಮಾನಿ, ಕಾಡ್, ಗುಡ್ಡೆ ,ತುದೆ, ಕಡಲ್, ಪಜಿರ್, ಮರ, ಪಂತಿ, ಕಲ್ಲ್, ಪೊಯ್ಯ, ಮನ್ನ್, ಗಾಲಿ, ನೀರ್, ಬೊಲ್ಪು ಪ್ರತಿಯೊಂಜೆನ್ಲಾ ಯೇತ್ ಪೊರ್ಲುಡು ಮುಡೆದ್ ದೀತೆರ್. ಒಂಜೆನ್ ಬುಡ್ದು ಒಂಜೆಕ್ಕ್ ಬದುಕಿಜ್ಜಿ. ಒಂಜೆತ ಕೊಲ್ಕೆ ತತ್ತ್ಂಡ ಪೂರ ಅಡಿಮೆಲಾಪಿನಂಚಿನ ಬೆಸಿಗೆ ಈ ಸ್ರಿಸ್ಟಿದ.
ಈ ಪ್ರಪಂಚಡ್ ನರಮಾನಿ ಒಂಜಿ ಅದ್ಭುತ ಸ್ರಿಸ್ಟಿ , ಆಯೆಲಾ ಮುರ್ಗನೆ ಆಂಡ ಬಾಕಿದಲೆಕ ಅತ್ತ್ , ದೇವೆರ್ ಆಯನ್ ವಿಶೇಷವಾದ್ ಸೃಸ್ಟಿ ಮಲ್ದೆರ್ ಆಯೆ ಬುದ್ದಿವಂತೆ, ಬದಲಾಯಿನ ಕಾಲದ ಒಟ್ಟುಗು ಬರವು ಸರವು ಕಲ್ತುದು ವಿದ್ಯಾವಂತೆ ಆತಿನಾಯೆ. ಆಂಡ ದಾದ ಮಲ್ಪುನು ಪನ್ಲೆ ನಮ್ಮೆಟ್ಟೇ ಒಂಜಿ ಪಾತೆರ ಉಂಡತೆ ಅತಿ ಆಂಡ ಅಮೂರ್ತಲ ಇಸ ಆಪುಂಡು ಪಂದ್ ಅಂಚೆನೇ ನರಮಾನಿ ಕಲ್ತಿನ ಜಾಸ್ತಿ ಆಂಡ್ ಈ ಬೂಮಿ ತನ್ನನ್ನೇ ಸ್ವತ್ತು ಪನ್ಪಿ ಆಂಕರ ಆಯನ ಮಂಡೆಗ್ ಅಡರಿ ಬೊಕ್ಕ ಲೋಕ ಉದ್ದಾರ ಮಲ್ಪುವೆ, ದೇಶ ಅಭಿವೃದ್ಧಿ ಮಲ್ಪುವೆ, ಪನೊಂದು ಅಂಸನಿಡ್ ಬೂಮಿನೇ ಅಡಿಮೇಲ್ ಮಲ್ಪರೆ ಪಿದಾಡ್ದೆ. ಅಂದ್ ನಮ ಉದ್ದಾರ ಆವೊಡು, ನಮ್ಮ ಜೋಕುಲು ಬಾಲೆಲು ಪೂರ ಕುಸಿಟ್ ಉಪ್ಪೊಡು ಸರಿ.. ಆಂಡ ಬೂಮಿನ್ ಅಲ್ಲೋಲ ಕಲ್ಲೋಲ ಮಲ್ತುದು ನಮಕ್ ಬದುಕರೆ ಸಾಧ್ಯನೇ. ಆಂಡ ತೆರಿಯೊನರೆ ತಯಾರಿಜ್ಜೆ. ಮಾರ್ಗ ಮಲ್ಪರೆ ಬರಿಟ್ ಇತ್ತಿನ ಆನೆ ಗಾತ್ರದ ಮರ ಕಡ್ತೆ, ತೋಡು ಮಾರ್ಗ ಪೂರ ಕಾಂಕ್ರಿಟ್ ಪಾಡ್ದ್ ಮುಚ್ಚಿಯೆ, ಗುಡ್ಡೆ ಜರ್ತೆ ಇಲ್ಲ್ ಕಟಿಯೇ, ಕರ್ಕಾನೆದ ತೆಟ್ಟ್ ನೀರ್ನ್ ಕಡಲ್‌ಗ್ ಬುಡಿಯೆ , ಅಲ್ಪಲ್ಪ ಪ್ರಾಸ್ಟಿಕ್‌ದ ರಾಶಿ ಪಾಡಿಯೇ ಇಂಚ ದಾದ ಪೂರ ಅನರ್ತ ಮಲ್ಪರೆ ಆಪುಂಡ ಅವೆನ್ ಪೂರ ಮಲ್ತೊಂದು ಬತ್ತೆ. ಸಂಶೋಧಕೆರ್ ಪನ್ಪೆರ್ ನನ ನೂದು ವರ್ಸೊರ್ದು ಬೊಕ್ಕ ಬೂಮಿಡ್ ಬದ್ಕರೆ ಸಾಧ್ಯನೇ ಇಜ್ಜಿಗೆ. ನಮ ಅಭಿವೃದ್ಧಿದ ಪುದರ್ಡ್ ಬೂಮಿಗ್ ಮಲ್ಪುನ ಅನ್ಯಾಯನೇ ಉಂದೆಕ್ ಕಾರನ ಪಂದ್.
ವಿಜ್ಞಾನಿಲು ಪನ್ಪೆರ್ ಬೂಮಿ ತನ್ನ ಕಕ್ಷೆಡ್ದ್ 80 ಸೆ. ಮೀ ಸ್ತಾನ ಪಲ್ಲಟ ಅತ್ತುಂಡು ಪಂದ್. ಉಂದೆಕ್ ಕಾರನ ನಮ ಅಂತರ್ಜಲ (ಒಸರ್ ನೀರ್ ) ಪಂದ್ ದಾದ ಪನ್ಪ ಅವೆನ್ ಲೆಕ್ಕೊಡ್ದು ಜಾಸ್ತಿ ಗಲಸ್‌ದಿನ . ಸಾಧಾರಣ ಮುಪ್ಪ ವರ್ಸೊರ್ದು ಬೂಮಿದ ಉಲಯ್ ಉಪ್ಪುನ ನೀರ್ನ್ ಒಟ್ರಾಸಿ ಉಪಯೋಗ ಮಲ್ತುದು ಈ ಸ್ಥಿತಿ ಬೈದುಂಡು. 1970 ಇಸವಿಡ್ ಯುನಿಸೆಫ್ ಕಾಲಿ ಪರ್ಪಿನ ನೀರ್‌ಗಾತ್ರ ಭಾರತಡ್ ಬೋರ್‌ವೆಲ್ದ ಪೊಲಬು ಮಲ್ತುದು ಕೊರುಂಡು ಆಂಡ 1980 ದ್ ಐತ ಬಳಕೆ ಜಾಸ್ತಿ ಆಂಡ್. ಇತ್ತೆ 1000/ 1500 ಅಡಿ ಗಾಂತ್ದ ಬೋರ್ವೆಲ್‌ನ್ ತೋಡುವೆರ್. 50 ವರ್ಸೊರ್ದು ದುಂಬು ಒಸರ್ ನೀರ್ನ್ ಅಮೂರ್ತ ಪಂದ್ ಪನೊಂದು ಇತ್ತೆರ್ ದಾಯೆಗ್ ಪಂಡ ಅವ್ ಆತ್ ಸುದ್ದ ಇತ್ತುಂಡ್. ಬರ್ಸದ ನೀರ್ ಬೂಮಿದ ಉಲಯ್ ಪೋದು ಐತಾತೆಗೆ ಸುದ್ದ ಆವೊಂದು ಇತ್ತುಂಡು ಐಟ್ ದಾಲ ಕಲಂಕ್ ಒರಿಯೊಂದು ಇತ್ತುಜ್ಜಿ. ಆಂಡ ಇತ್ತೆ ಒಸರ್ ನೀರ್ಲಾ ಆಲಾತುಂಡ್.
ಭಾರತ ಪಂದ್ ಅತ್ತ್ ಇಡೀ ವಿಸ್ವಡ್ 1993 ದ್ 2010 ಇಸವಿ ಮುಟ್ಟ ಬೂಮಿದ ಉಲಾಯಿದ ನೀರ್ನ್ ನಮ ಸುಮಾರ್ 2100 ಗಿಗಾ ಟನ್‌ದಾತ್ ಗಲಸ್‌ದ್ ಆಜಾದ, ಆ ಕಾರನಗೆ ಬೂಮಿ ತನ್ನ ಕಕ್ಷೆಡ್ದ್ ಸ್ತಾನ ಪಲ್ಲಟ ಆತಿನಿ. ಅಂತರ್ಜಲ ಜಾಸ್ತಿ ಉಪಯೋಗ ಮಲ್ತಿನೆಡ್ದಾವರ ಬೂಮಿದ ಮಿತ್ತ್ ಒತ್ತಡ ಜಾಸ್ತಿ ಆದ್ ತಾಪಮಾನ ( ಉಸ್ನ) ಜಾಸ್ತಿ ಆತುಂಡು, ಉಸ್ನ ಜಾಸ್ತಿ ಆದ್ ಬೂಮಿದ ದ್ರುವೊತ್ತ ಸೀಮೆಗೆಡ್ಡೆ ಕರದ್ ಕಡಲ್ ಸೇರಿನ್ಡ್, ಉಂದೆತ ಕಾರನವಾದ್ ಸಮುದ್ರದ ನೀರ್ 0.3 ಮಿಲಿ ಮೀಟರ್ ಏರಿಕೆ ಆದ್ ಬೂಮಿನ್ ಉಲಯ್ ಒಯ್ತೊಂದುಂಡು, ಉಂದು ಇಂಚೆನೇ ದುಂಬೊರಿಯೊಂದು ಪೋಂಡ ಬೂಮಿ ನೀರ್ಡ್ ಮುರ್ಕುಂಡು. ಬೂಮಿದ ದ್ರುವತ ಸಿಮಗೆಡ್ಡೆ ಕರಗ್ಂಡ ಬೂಮಿದ ಚಲನೆಡ್ ಬೊಕ್ಕ ಬೇಗಡ್ಲಾ ವ್ಯತ್ಯಯ ಆಪುಂಡು ಉಂದು ಬೊಕ್ಕ ಪಗೆಲ್ ರಾತ್ರೆಡ್ ಅಂಚನೆ ಪೊರ್ತುಡ್ಲಾ ವ್ಯತ್ಯಯ ಆರೆ ಕಾರನ ಆಪುಂಡು. ಸಂಶೋದಕೆರ್ ಪನ್ಪಿನ ಪ್ರಕಾರ ಸುಮಾರ್ 20000 ವರ್ಸೊರ್ದು ದುಂಬು ಇತ್ತೆದ ಸಹರಾ ಮರುಬೂಮಿ ನಿತ್ಯಹರಿದ್ವರ್ಣದ ಕಾಡದಿತ್ತುಂಡ್‌ಗೆ ಬೂಮಿದ ಚಲನೆಡ್ ಆಯಿನ ಒಂಜಿ ಎಲ್ಯ ವ್ಯತ್ಯಯ ಅವೆನ್ ಬಂಜರ್ ಮಲ್ತುದು ಬುಡುಂಡುಗೆ. ಉದೇನ್ ಕೇಂನಗನೇ ಪೋಡಿಗೆ ಆಪುಂಡು.
ಭಾರತಡೇ 33 ಮಿಲಿಯನ್ ಬೋರ್ವೆಲ್ ಉಂಡು ಐಟ್ ಕಾಲಿ ಕರ್ನಾಟಕಡೇ 1, 18,736 ಬೋರ್ವೆಲ್ 70 ಮೀ ಗಾಂತ್ದ , 40, 186 ಬೋರ್ವೆಲ್ 150 ಮೀ. ಗಾಂತ್ದ , ಬೊಕ್ಕ ಒರಿದಿನ 800 / 1000 ಅಡಿ ಮುಟ್ಟ ಗಾಂತ್ದ ಬೋರ್ವೆಲ್ ಉಂಡು ಅವು ಸುಮಾರ್ 2, 85,000 ಎಕರೆ ಬೂಮಿಗೆ ನೀರ್ನ್ ಕೊರೊಂದುಂಡು. ನಮಕ್ ಮಾತೆರೆಗ್ಲ ಗೊತ್ತುಂಡು ಇತ್ತೆ ನೀರ್ದ ಯೇತ್ ಬರ ಉಂಡು ಪಂದ್ ಅಂಚ ಪಂದ್ ಬೂಮಿದ ಉಲಯಿದ ನೀರ್ನ್ ಒಟ್ರಾಸಿ ಗಲಸುನು ತಪ್ಪು. ನಮ ಒಸರ್ ನೀರ್ನ್ ನಮಕ್ ಬೋಡ್ತಿಲೆಕ್ಕ ದೆಪ್ಪುವ ಆಂಡ ಐಕ್ ಕುಡ ನೀರ್ನ್ ಸೇರ್ಪಾವುನು ಕೆಲಸ ಮಲ್ತೊಂದು ಇಜ್ಜ. ಮಾರ್ಗ ಅಗಲ ಮಲ್ಪರೆ ಮರ ಕಡ್ತ ಆಂಡ ರೂಲ್ಸ್ ಪ್ರಕಾರ ಒಂಜಿ ಮರ ಕಡ್ಪೊಡ್ಡ ಒಂಜಾತ್ ದೈ ನಡೊಡು ಆಂಡ ನಡ್ಪೆರೆ? ಇಜ್ಜಿ.. ಒಂಜಿ ಬಿಲ್ಡಿಂಗ್ ಕಟ್ಟುಂಡ ಬರ್ಸದ ನೀರ್ನ್ ಒರಿಪುನ ವ್ಯವಸ್ಥೆ ಮಲ್ಪೊಡು ಮಲ್ಪುವೆರ ..ಇಜ್ಜಿ . ಬರ್ಸದ ಪ್ರಮಾಣ ಇತ್ತೆ ಮಸ್ತ್ ಕಮ್ಮಿ ಆತುಂಡು ಬತ್ತಿನ ಬರ್ಸದ ನೀರ್ಲಾ ಕೊಂಕ್ರೀಟ್ ರೋಡು ತೋಡುಡ್ದು ಸೀದಾ ಕಡಲ್ ಸೇರುಂಡು . ನಮ ಈ ನೀರ್ನ್ ಒರಿಪುನ ವ್ಯವಸ್ಥೆ ಮಲ್ಪೊಡು.
ಈ ನಿಟ್ಟ್‌ಡ್ ಟೀಮ್ ಐಲೇಸಾದ ಕಜ್ಜ ಉಡಲ್‌ಗ್ ತಲ್ಮನೆ ಕೊರ್ಪುಂಡು ಅಕುಲು ಇಂಚಪ್ಪ ಸುರು ಮಲ್ದಿನ ಊರಿಗೊಂದು ಕೆರೆ ಅಭಿಯಾನ ಬಾರಿ ಪುಗಾರ್ತೆ ಪಡೆಯೊಂದುಂಡು . ಒನ್ಲೈನ್ ಮೀಟಿಂಗ್‌ಡ್ ವಿಜ್ಞಾನಿಲೆನ್, ತಜ್ಞೆರೆನ್ ಲೆತ್ತುದು ಅಂತರ್ಜಲತ ಮಹತ್ವ ಬೊಕ್ಕ ಅವೆನ್ ಒರಿಪಾವುನು ಎಂಚ ಪನ್ಪಿನ ವಿಷಯಡ್ ಪೊಲಬು ಕೊರ್ಪಾದ್ ಜನ ಮಂದೆಲೆಗ್ ಎಚ್ಚರ ಕೊರ್ಪಿನ ಎಡ್ಡೆ ಬೇಲೆನ್ ಮಲ್ತೊಂದು ಉಲ್ಲೆರ್. ಸುರುತ ಮೀಟಿಂಗ್‌ಡ್ ಖಲೀಫಾ ಯುನಿವರ್ಸಿಟಿದ ಯುವ ವಿಜ್ಞಾನಿ ಡಾ. ದಿನೇಶ್ ಶೆಟ್ಟಿ "ನೀರು ಜೀವ ಜಲ , ಬೆಲೆ ಏಕಿಲ್ಲ?" ಪನ್ಪಿನ ವಿಚಾರೊಡು ಪಾತೆರೊಂದು ನಮ ನಿಚ್ಚೊ ಯೇತ್ ನೀರ್ನ್ ಹಾಳ್ ಮಲ್ಪುವ ಅವೆನ್ ಎಂಚ ತಡೆಪೊಲಿ ಪನ್ಪಿನ ವಿಸಯಡ್ ಎಡ್ಡೆ ಮಾಹಿತಿ ಕೊರ್ದಿತ್ತೆರ್, ರಡ್ಡನೇ ಮೀಟಿಂಗ್‌ಡ್ ಹಿರಿಯ ಸಿವಿಲ್ ನ್ಯಾಯಾಧೀಸೆರ್ ಬೊಕ್ಕ ಜಿಲ್ಲಾ ಕೆರೆ ಸಂರಕ್ಷಣಾ ಸಮಿತಿದ ಪದುಕೆರಾಯಿನ ಶ್ರೀ ಸಂದೀಪ್ ಸಾಲಿಯಾನ್ "ನೀರು ಜೀವ ಜಲ ಸಂರಕ್ಷಿಸೋಣ ಜಲಮೂಲ" ವಿಷಯಡ್ ಪೊಲಬು ಕೊರೊಂದು ಪೂರ ನೀರ್ದ ಮೂಲೊಲೆನ್ ಕೆಸರ್, ಕಜವು, ಪ್ಲಾಸ್ಟಿಕ್ ಪೂರ ದೆತ್ತುದು ಸ್ವಚ್ಛ ಮಲ್ಪೊಡು, ನೀರ್ ಒರಿಪರೆ ಸರ್ಕಾರ ಮಲ್ದಿನ ಕ್ರಮೊಕುಲೆನ್ ಸರಿಟ್ ಪಾಲನೆ ಮಲ್ಪೊಡು, ಬರ್ಸ ನೀರ್ ಬೂಮಿದ ಉಲಯಿ ಜಪ್ಪರೆ ಇಂಗು ಗುಂಡಿ ಮಲ್ಪೊಡು ಪನ್ಪಿನ ವಿಚಾರ ಪಟ್ಟೊಂದು ಇತ್ತೆರ್. ಈ ಕಜ್ಜೊಡು ಕೆಲವೊಂಜಾತ್ ಜನ ಉಮೇದ್ ದೆತೊಂದು ಅಕಲ್ನ ಊರುಡು ಗುವೆಲ್, ಕೆದು, ತೋಡುನ್ ಪೂರ ಸರಿ ಮಲ್ತುದು ನೀರ್ ಒರಿಪುನ ಬೇಲೆನ್ ಬಾರಿ ಮೋಕೆಡ್ ಮಲ್ತೊಂದು ಉಲ್ಲೆರ್. ಐಲೇಸಾದ ಈ ಪ್ರಯತ್ನ ನಿಜವಾದ್ಲಾ ಮೆಚ್ಚೊಡಾಯಿನ. ಜುಲೈ 2 ಕ್ಕ್ ಮೂಜನೇ ಮೀಟಿಂಗ್ Zoom virtual ವೇದಿಕೆಡ್ ನಡಪರೆ ಉಂಡು ಮೀಟಿಂಗ್ I'd : 81978777104 pass code: ilesa. ಆನಿ ಸಸ್ಯ ಬೊಕ್ಕ ಜೈವಿಕ ವಿಜ್ಞಾನಿ ಡಾ. ಕೇಶವ ಹೆಗ್ಡೆ ಕೊರ್ಸೆ " ಮಳೆ ನೀರು ಕೊಯ್ಲು ಮತ್ತು ನೀರು ಇಂಗಿಸುವೆಕೆ" ಈ ವಿಸಯೊಡು ಪೊಲಬುನು ಪಟ್ಟೊನರೆ ಉಲ್ಲೆರ್. ಒಸರ್ ನೀರ್ದ ರಕ್ಷಣೆ ಯೇತ್ ಅಗತ್ಯ ನಮಕ್ ಪನ್ಪಿನ ನಮಕ್ ಗೊತ್ತಾತುಂಡ್ ನನ ಆಂಡಲಾ ಈ ಎಡ್ಡೆ ಕಜ್ಜೊಗು ಬೆರಿಬಲ ಕೊರ್ಕ. ನಮಕ್ಕತ್ತ್ ನಮ್ಮ ಬೊಕ್ಕದ ಪೀಳಿಗೆಗ್ ಆಸ್ತಿ ಅಂತಸ್ತ್ ಮಲ್ತುದು ದೀಪಿನೆಡ್ದ್ ಸುದ್ದ ಗಾಲಿ, ಸುದ್ದ ನೀರ್ ದ ಉಡುಗಿರೆ ಕೊರ್ಕ.
✍️ ಗೀತಾ ಲಕ್ಷ್ಮೀಶ್