ಮುಗಲ್ ಬೊಲ್ಪುದ ರಂಗ್ ಡ್ ಬಾನೊ ದೇವೆರ್ ತೆಲಿತೆರ್
ಮಡಿ ಮೋಕೆದ ಬೃಂದಾವನಡ್ ಪುರ್ಪ ಗ್ ಕೈ ನೀಟಿಯಲ್ ರಾದೆ
ಪುರ್ಪದಲೆಕ ಜೋಪಾನಾ ಮಲ್ಪುನ ತನ್ನಯನ ಕೈ ಸೇರ್ದ್
ನವಿಲ್ ಗರಿಯೇ ನಾಚಿಕೆಡ್ ನೀರಾಂಡ್ ಈ ಪೊರ್ಲು ಪೊರ್ತು.....
ಏಳ್ ಪಜ್ಜೆ ಜೊತೆಜೊತೆಟ್ ದೀಯಿಂಜಿಂಡ ದಾನೆ ಮೋಕೆ ಸೋತಿಜಿ
ಕರಿಮಣಿ ನ್ ಕಟ್ಟಿಜಿಂಡ ದಾನೆ ಬದ್ ಕ್ ಕರ್ಪಿಲ್ಲಾಯಿಜಿ
ಪ್ರತಿ ಗಳಿಗೆಲಾ ಒಟ್ಟುಗು ಇಜ್ಜಿ0ಡ ದಾನೆ ಮೋಕೆ ತೆಗ್ಲೊಂದೇ ಪೋಂಡು
ಉಸುಲ್ ಉಸುಲ್ ಡ್ ದುನಿಪುನ ಮೋಕೆ ಪುರಲಾ ಸ್ವರ ಆದ್ ಪಸರ್ಂಡ್.....
ಸಾರ ಜನ ಗೋಪಿಕೆನಕುಲೆಗ್ ಕೃಷ್ಣನ ಉಡಲ್ ಗೆಲ್ಪೆರೆ ಆಯಿಜಿ
ಅವ್ವೆತೋ ಬೊಲ್ಲೆನೊದ ಜವನೆರೆಡ್ಲಾ ರಾಧೆ ಗ್ ಆಸೆ ಮೂಡಿಜಿ
ಇರ್ಲ್ ಪಗೆಲೇ ತೆರಿಯಿಜಿ ಕೃಷ್ಣನ ಪುರಲ್ ದ ರಾಗೊಗು
ಕೃಷ್ಣನ ಕಣ್ಣುಲು ಮುಚ್ಚಿಜಿ ರಾಧೆ ನ ನಲಿಕೆದ ಪೊರ್ಲುಗು.......
ರಾಧೆ ಮೋಕೆದ ತೇರ್ ಏರಿಯಲ್ ಕೃಷ್ಣ ನ್ ಸೇರೊಂದು
ಮಡಿ ದಿಂಜಿ ಮೋಕೆಗ್ ಮಡೆ ಬೂರಿಜಿ ಕೊಡೆ ಆಂಡ್ ನಿಷ್ಕಲ್ಮಶ ಉಡಲ್
ಕಾಮ ನಲಿಪಂದಿನಪಗ ರಡ್ಡ್ ಕಣ್ಣುಲು ತೆಲಿತ
ಉಡಲ್ ಜೋಡಿ ಆಂಡ್ ಸೂರ್ಯ ಚಂದ್ರರೆ ನ್ ಸಾಕ್ಷಿ ಆದ್....
ದಾಯೆ ಪುಟ್ಟುಜಿ ಮೋಕೆ ಇನಿಕಾನಗ ನಿಕ್ಲೆನಂಚಿನ
ಲಾಂಬುದಲೆಕ ನಾಲ್ ದಿನಟ್ ಮೂಡುದು ಅಳಿಯಂದಿನ
ಕಲಿಗಾಲಡ್ ಕಲೆಂಕ್ದಿನ ಕೆಲವು ಮರ್ಲ್ ಮೋಕೆಲೆನ್ ತೂನಗ
ಓ ರಾಧಾಕೃಷ್ಣೆರೆ ನಿಕ್ಲೆನ ಈ ಮೋಕೆನೇ ಬಿಲೆ ಕಟ್ಟೆರಾವಂದಿನ .....
✍️ಅಮರ್‌ನಾಥ್ ಪೂಪಾಡಿಕಲ್ಲ್
ತುಲುವೆರೆ ಕಲ ಕುಡ್ಲ