ಕವಿ ಚಿಮಕ
ದಸರಾ ದಸರಾ, ಮೈಸೂರು ದಸರಾ!
ಸುಂದರ ದಸರಾ, ಅತಿ ಸುಂದರ ದಸರಾ!
ಹೃದಯದಲ್ಲಿ ಹೂವಾಗಿ ಅರಳುವ ಪ್ರೀತಿಯ ದಸರಾ!
ಚಾಮುಂಡಿ ತಾಯಿಯ ಪುಣ್ಯದ ಕಾಣಿಕೆ — ಮೈಸೂರು ದಸರಾ! ||೧||
ಹರುಷವ ತಂದಿತು, ಮನವನು ಕುಣಿಸಿತು,
ಜನಮನ ಸೆಳೆದು, ವೈಭವ ಮೆರೆದಿತು;
ದೀಪದ ಬೆಳಕಲಿ ಮೈಸೂರು ಹೊಳೆಯಿತು,
ಸಪ್ತ ಕಡಲಾಚೆಯ ಜಗವನ್ನೆ ಸೆಳೆಯಿತು — ಮೈಸೂರು ದಸರಾ! ||೨||
ಚಿನ್ನದ ಅಂಬಾರಿ ಹೊತ್ತು ಗಜರಾಜ ನಡೆದು,
ಯದುವಂಶದ ವೈಭವ ಕಣ್ಮುಂದೆ ಬಂದು;
ಜಂಬೂಸವಾರಿಯಲಿ ಕರುನಾಡು ಹರ್ಷದಿ ಕುಣಿದು,
ತಾಯಿ ಚಾಮುಂಡೇಶ್ವರಿಯ ಕೃಪೆಯಿಂದ ಮೆರೆದಿತು — ಮೈಸೂರು ದಸರಾ! ||೩||
ಮನೆಮನೆಯ ಬಾಗಿಲಲಿ ಹಬ್ಬದ ಹಣತೆ ನಗುತಿರಲು,
ಬೀದಿ ಬೀದಿಗಳಲ್ಲಿ ಬಣ್ಣದ ದೀಪಗಳು ಮಿನುಗಿರಲು;
ತಲೆಮಾರುಗಳ ನೆನಪಿನಲಿ ಹೊಸದೊಂದು ಪುಟ ತೆರೆದು,
ಹೃದಯದಲ್ಲಿ ಚಿರಕಾಲ ಉಳಿಯಿತು— ಮೈಸೂರು ದಸರಾ! || ೪||
ಚಾಮುಂಡಿ ಬೆಟ್ಟದಲಿ ಭಕ್ತಿಯ ಗೀತೆ ಮೊಳಗಿರಲು,
ಅರಮನೆಯ ಅಂಗಳದಿ ಕಲೆಯ ಕಂಪು ತುಂಬಿರಲು;
ದಸರೆಯ ಸೊಬಗು ಕಣ್ಣಲಿ ತುಂಬಿ ಜಗಮಗಿಸುತಿರಲು,
ಹೃದಯವ ಸ್ಪರ್ಶಿಸಿ ಮನವನು ಗೆದ್ದಿತು — ಮೈಸೂರು ದಸರಾ! ||೫||